اقربا پروری پر روک لگانے کے لیے بی جے پی اراکین پارلیمان کے بچوں کو ٹکٹ نہیں دیا: پی ایم مودی

نئی دہلی: وزیر اعظم نریندر مودی نے کہا ہے کہ اگر حال ہی میں اختتام پذیر ہونے والے اسمبلی انتخابات میں بھارتیہ جنتا پارٹی (بی جے پی) کے اراکین پارلیمان کے بچوں کو ٹکٹ نہیں دینا گناہ ہے، تو یہ گنا انہوں نے کیا ہے۔ مودی نے منگل کے روز بی جے پی پارلیمانی پارٹی کی میٹنگ سے خطاب کرتے ہوئے پارٹی اراکین پارلیمنٹ سے کہا کہ ’ پریوار وادی پارٹی، ذاتی واد پارٹی‘ ہوتی ہے اور اگر اس کے خلاف لڑائی لڑنی ہے تو بی جے پی میں بھی اس کا خیال رکھنا ہوگا۔

انہوں نے کہا کہ بی جے پی نےاراکین پارلیمان کے بچوں کو اسمبلی انتخابات کے لئے میدان میں نہیں اتارا، لیکن انہیں اس بات کی خوشی ہے کہ اس کے باوجود تمام ممبران پارلیمنٹ نے پارٹی کو جیت دلانے کے لئے دل و جان سے کام کیا، اس کے لئے تمام اراکین پارلیمنٹ کا شکریہ۔

میٹنگ میں پی ایم مودی نے ارکان پارلیمنٹ سے کہا کہ وہ اپنے اپنے علاقوں میں ہارے ہوئے سو سو بوتھوں کا جائزہ لینے کے بعد ایک رپورٹ تیارکریں کہ ان بوتھوں میں پارٹی کے ہارنے کی کیا وجہ رہی۔ حال ہی میں ریلیز ہونے والی فلم ’دا کشمیر فائلز‘ کا ذکر کرتے ہوئے انہوں نے کہا کہ یہ ایک اچھی فلم ہے اور اس طرح کی فلمیں بنتی رہنی چاہئیں تاکہ حقیقت سامنے آ سکے۔

پارلیمانی پارٹی کی میٹنگ کے بعد پارلیمانی امور کے وزیر پرہلاد جوشی نے صحافیوں کو بتایا کہ میٹنگ میں پی ایم مودی نے اقربا پروری کے خلاف بی جے پی کی پہل کی تعریف کی۔ انہوں نے بتایا کہ وزیر اعظم نے یوکرین میں پھنسے ہوئے ہندوستانی طلباء کو باہر نکالنے کے لیے حکومت کی جانب سے چلائے گئے ’آپریشن گنگا‘ کا ذکر کرتے ہوئے اپوزیشن جماعتوں پر اس معاملے پر سیاست کرنے کا الزام بھی عائد کیا۔ وزیر خارجہ ایس جئے شنکر نے میٹنگ میں یوکرین کے مسئلہ پر ایک پریزنٹیشن بھی دیا۔

اس سے پہلے بی جے پی صدر جگت پرکاش نڈا کی قیادت میں بی جے پی پارلیمانی پارٹی کی میٹنگ میں پارٹی کے تمام اراکین پارلیمنٹ نے اسمبلی انتخابات میں کامیابی پر وزیر اعظم کو مبارکباد دی۔ پارلیمانی پارٹی کی میٹنگ میں مودی کے پہنچتے ہی چار ریاستوں میں جیت کے لیے اراکین پارلیمنٹ نے تالیاں بجا کر ان کا استقبال کیا۔

انتخابات میں شاندار فتح کے لئے بی جے پی کے سابق صدور و وزیر داخلہ امت شاہ، وزیر دفاع راج ناتھ سنگھ اور روڈ ٹرانسپورٹ اینڈ ہائی ویز کے وزیر نتن گڈکری نے پی ایم مودی اور جے پی نڈا کا ہار پہنا کر خیرمقدم کیا اور انہیں انتخابات میں شاندار کامیابی پر مبارکباد دی۔