ادھو ٹھاکرے کی اہلیہ کورونا متاثر، سماجی انصاف کے وزیر دوسری مرتبہ کورونا متاثر

مہاراشٹر میں کورونا کا قہر جاری ہے۔ مہاراشٹر کے وزیر اعلی ادھو ٹھاکرے کی اہلیہ رشمی ٹھاکرے جانچ کے بعد کورونا متاثر پائی گئی ہیں ۔ واضح رہے 11مارچ کو وزیر اعلی اور ان کی اہلیہ نے کورونا ویکسین کا پہلا ٹیکہ لگوایا تھا۔ دو دن قبل ان کا بیٹا آدتیہ ٹھاکرے بھی کورونا متاثر پایا گیا تھا۔ رشمی ٹھاکرے کوارنٹائن میں ہیں۔

دوسری جانب ریاست کے سماجی انصاف کے وزیر دھننجے منڈے بھی کورونا جانچ میں کورونا متاثر پائے گئے ہیں۔یہ دوسری مرتبہ ہے کہ وہ کورونا متاثر پائے گئے ہیں۔ اس سے قبل 12جون 2020کو بھی وہ کورونا سے متاثر ہو کر ٹھیک ہو چکے ہیں۔اس کی اطلاع خود وزیر موصوف نے ٹویٹر کے ذریعہ دی اور ان لوگوں سے جانچ کرانے کی درخواست کی ہے جو پچھلے دنوں ان سے رابطہ میں آئے ہیں۔

ملک میں کورونا وائرس (کووڈ۔19) وبا سے سب سے زیادہ متاثرہ مہاراشٹر میں منگل کو اس کے انفیکشن کے 28,699نئے معاملے سامنے آنے سے متاثرین کی تعداد بڑھ کر 25,33,026ہوگئی۔

سرکاری ذرائع کے مطابق اسی مدت میں 13,165مزید مریضوں کے صحت یاب ہوجانے سے اس وائرس سے نجات پانے والوں کی تعداد 22,47,495ہوگئی ہے اور 132 مزید مریضوں کی موت ہوجانے سے مرنے والوں کا اعدادوشمار 53,589تک پہنچ گیا ہے۔

ریاست میں مریضوں کے صحت یاب ہونے کی شرح 88.73فیصد پر پہنچ گئی ہے جبکہ اموات کی شرح 2.12فیصد ہے۔مہاراشٹر میں کورونا کے فعال معاملات بڑھ کر 2,30,641ہوگئے ہیں۔ خیال رہے کہ مہاراشٹر ملک میں کورونا وائرس، صحت یاب اور اس و ائرس سے ہونیو الی اموات کے معاملہ میں پہلے نمبر پر ہے۔