چھتیس گڑھ: دوسرے مرحلے کی ووٹنگ بھی ختم، پولنگ پارٹی پر نکسلی حملہ میں فوجی جوان کی موت

چھتیس اسمبلی انتخاب کے دوسرے اور آخری مرحلہ کی پولنگ آج چھوٹے موٹے نکسلی تشدد کے درمیان اختتام پذیر ہو گیا۔ اس مرحلہ کی سبھی 70 اسمبلی سیٹوں پر شام 5 بجے تک ووٹ ڈالنے کا وقت طے تھا۔ جو اعداد و شمار سامنے آئے ہیں اس کے مطابق دوسرے مرحلہ میں سبھی سیٹوں پر 67.34 فیصد ووٹنگ درج کی گئی ہے۔

اس درمیان خبریں سامنے آ رہی ہیں کہ آج پولنگ کے بعد گاریا آباد میں پولنگ مرکز سے لوٹ رہی ایک پولنگ پارٹی کو نشانہ بنا کر نکسلیوں نے آئی ای ڈی دھماکہ کیا جس میں ایک آئی ٹی بی پی جوان کی موت ہو گئی۔ آئی جی رائے پور رینج عارف شیخ نے بتایا کہ جب پولنگ پارٹی بڑے گوبرا پولنگ مرکز سے لوٹ رہی تھی تبھی نکسلیوں نے پولنگ پارٹی کو نشانہ بناتے ہوئے آئی ای ڈی دھماکہ کیا۔ اس دھماکے میں آئی ٹی بی پی کے ہیڈ کانسٹیبل جوگندر سنگھ کی موت ہو گئی۔ پولنگ پارٹی اور ای وی ایم مشین بہ حفاظت گاریابند پہنچ گئی ہے۔

کچھ میڈیا رپورٹس کے مطابق ووٹنگ کے دوران بھی کچھ مقامات پر نکسلیوں نے سیکورٹی اہلکاروں کو نشانہ بنانے کی کوشش، حالانکہ اس میں کسی جانی نقصان کی خبر نہیں ہے۔ بیشتر مقامات پر رائے دہندگان نے پرامن ماحول میں اپنے حق رائے دہی کا استعمال کیا۔ ریاست میں ووٹنگ کو لے کر لوگوں میں جوش دیکھنے کو ملا۔ کئی مقامات پر صبح ووٹنگ شروع ہونے سے پہلے ہی رائے دہندگان کی طویل قطاریں دیکھنے کو مل رہی تھیں۔

چھتیس گڑھ کے وزیر اعلیٰ اور دُرگ اسمبلی حلقہ سے کانگریس امیدوار بھوپیش بگھیل نے کروڈیہہ گاؤں میں پولنگ مرکز نمبر 57 پر اپنا ووٹ ڈالا۔ ووٹ ڈالنے سے قبل انھوں نے اپنے ایک بیان میں کہا کہ ’’کانگریس کو 75 سے زیادہ نشستیں حاصل ہونے والی ہیں۔ یہاں یکطرفہ لڑائی ہے، کوئی مقابلہ نظر نہیں آ رہا۔‘‘ انھوں نے مزید کہا کہ ’’چھتیس گڑھ کو مبارکباد۔ آپ سب اپنی جیت یقینی کر چکے ہیں۔ جو لوگ بچے ہوئے ہیں، ان کو ووٹ کرنے کے لیے کہیے۔ اب جیت کا فرق بڑھانا ہے۔ بس تھوڑا سا مزید دَم، 2018 سے بڑی جیت لا رہے ہیں ہم۔‘‘

واضح رہے کہ چھتیس اسمبلی انتخاب میں دو مراحل میں ووٹنگ کا عمل انجام پایا۔ پہلے مرحلہ میں 20 نشستوں کے لیے 7 نومبر کو ووٹ ڈالے گئے، اور بقیہ 70 نشستوں کے لیے آج (17 نومبر) ووٹرس نے حق رائے دہی کا استعمال کیا۔ سبھی سیٹوں پر ڈالے گئے ووٹوں کی گنتی 3 دسمبر کو ہوگی اور نتیجہ اسی دن سامنے آئے گا۔