مودی کی تلاشی: آئی اے ایس محمد محسن کی معطلی پر روک، الیکشن کمیشن سے جواب طلب

وزیر اعظم نریندر مودی کے ہیلی کاپٹر کی تلاشی لینے کے الزام میں معطل ہونے والے آئی اے ایس افسر محمد محسن کو بحال کر دیا گیا ہے۔ انہیں یہ راحت مرکز ٹریبیونل برائے انتظام (سی اے ٹی) نے دی ہے۔ معاملہ کی سماعت کرتے ہوئے ٹریبیونل نے فوری طور پر الیکشن کمیشن کے معطلی کے احکام پر روک لگا دی ہے۔ اب اس معاملہ کی سماعت 3 جون کو ہوگی۔

واضح رہے کہ محمد محسن اڈیشہ کے سنبل پور حلقہ انتخاب کے انخابی مبصر بنائے گئے تھے۔ الیکشن کمیشن نے انہیں معطل کرتے وقت کہا تھا کہ انہوں نے جانچ کے عمل میں اسپیشل پروٹیکشن گروپ کے اصولوں پر عمل نہیں کیا۔

اس معاملہ میں ٹریبیونل نے کہا کہ انتخابات کے دوران ایس پی جی سیکورٹی حاصل شخصیات کو حفاظت کی یقین دہائی کرائی جانی چاہئے یہ نہیں کہا جا سکتا کہ وہ ’کسی بھی چیز ‘ یا ’ہر ایک چیز ‘ کے حقدار ہیں۔ ٹریبیونل نے محسن کے ایڈوکیٹ کے اس تذکرے کا بھی ذکر کیا کہ اس طرح کی خبریں تھیں کہ کرناٹک میں وزیر اعظم کے قافلہ سے بھاری سامان لے جاکر دوسری گاڑی میں رکھا گیا اور وہ گاڑی تیزی سے نکل گئی۔ ٹریبیونل نے کہا کہ اس حوالہ سے سوال اٹھے لیکن کوئی کارروائی نہیں کی گئی۔

افسر کی طرف سے کہا گیا ہے کہ جس وقت وزیر اعظم کے ہیلی کاپٹر کی تلاشی لی گئی تو وہ وہاں تھے ہی نہیں۔ ٹریبیونل نے الیکشن کمیشن سے اس معاملہ کو چار ہفتوں میں جواب دینے کو کہا ہے تاکہ اسکا تصفیہ کیا جا سکے۔

محمد محسن کی معطلی پر حزب اختلاف نے ناراضگی ظاہر کی تھی۔ کانگریس نے کہا تھا کہ وہ افسر اپنی ڈیوٹی کر رہا تھا، اسے آخر کیوں ہٹایا گیا۔ آخر وزیر اعظم مودی اپنے ہیلی کاپٹر میں ایسا کیا لے کر جا رہے تھے جسے وہ ملک سے چھپانا چاہتے ہیں۔