چندرا بابونائیڈو نے دہلی کے دورے کے دوران مودی اور دیگر وزراء سے ملاقات کی

مرکز میں نیشنل ڈیموکریٹک الائنس (این ڈی اے) حکومت کے ایک اہم اتحادی تیلگو دیشم پارٹی (ٹی ڈی پی) کے سربراہ اور آندھرا پردیش کے چیف منسٹر این چندرابابو نائیڈو نے جمعرات کو دارالحکومت میں وزیر اعظم نریندر مودی اور کئی مرکزی محکموں کے وزراء سے ملاقات کرکے ریاست کی ترقی سے متعلق مختلف امور پر تبادلہ خیال کیا۔ ویسے ان کی وزیر اعظم سے ملاقات کو سیدھے طور پر نہیں دیکھا جاتا ۔

وزیر اعظم سے ملاقات کے بعد چندرا بابو  نائیڈو نے سوشل میڈیا پلیٹ فارم ایکس پر ایک پوسٹ میں کہا کہ وزیر اعظم  مودی کے ساتھ تعمیری بات چیت ہوئی۔ انہوں نے کہا کہ گفتگو کا اہم موضوع آندھرا پردیش کے عوام کی فلاح و بہبود اور ریاست کی ترقی سے متعلق مسائل تھے۔انہوں نے کہا، ’’مجھے یقین ہے کہ مودی کی قیادت میں ہماری ریاست ریاستوں کے درمیان ایک پاور ہاؤس کے طور پر ابھرے گی۔‘‘

واضح رہے چندرا بابو  نائیڈو نے لوک سبھا اور آندھرا پردیش اسمبلی انتخابات میں زبردست واپسی کی ہے۔ مرکز میں نیشنل ڈیموکریٹک الائنس حکومت میں ٹی ڈی پی کا کردار اہم ہے۔ دہلی میں اپنے قیام کے دوران وزیر اعلیٰ نے سطحی سڑکوں اور شاہراہوں کے وزیر نتن گڈکری، وزیر تجارت و صنعت پیوش گوئل اور شہری ترقیات اور مکانات کے وزیر منوہر لال سے بھی ملاقات کرکے ریاست کی اسکیموں کے بارے میں تبادلہ خیال کیا۔

نائیڈو نے وزیر گڈکری کے ساتھ ریاست میں نیشنل ہائی وے پروجیکٹوں کی پیش رفت کا جائزہ لیا۔ میٹنگ میں مرکزی اور ریاستی حکومت کے افسران بھی شامل تھے۔ انہوں نے یقین ظاہر کیا کہ مرکزی اور ریاستی حکومتیں مل کر سڑکوں کے منصوبوں کو تیز کریں گی اور شاہراہیں ترقی اور خوشحالی کا راستہ بنیں گی۔

چندرا بابو  نائیڈو نے وزیر تجارت پیوش  گوئل کے ساتھ تجارت اور صنعت سے متعلق مختلف مسائل پر تبادلہ خیال کیا اور کہا کہ تعاون پر مبنی وفاقیت کے جذبے سے کام کرتے ہوئے ہم آندھرا پردیش میں امکانات کے نئے دروازے کھولیں گے۔

ٹی ڈی پی کے مرکزی شہری ہوا بازی کے وزیر رام موہن نائیڈو کنجراپو اور دیہی ترقیات اور مواصلات کے وزیر مملکت ڈاکٹر چندر شیکھر پیمسانی بھی شہری ترقی کے وزیر مسٹر منوہر لال کے ساتھ وزیر اعلیٰ کی ملاقات میں موجود تھے۔ میٹنگ کے بارے میں منوہر لال نے سوشل میڈیا پر کہا کہ انہوں نے نائیڈو کے ساتھ بات چیت کی کہ کس طرح آندھرا پردیش میں خوشحالی اور اقتصادی ترقی کے امکانات کو وزیر اعظم مودی کی قیادت میں بڑھایا جا سکتا ہے۔

چندرا بابو نائیڈو نے زراعت اور کسانوں کی بہبود اور دیہی ترقی کے وزیر شیوراج سنگھ چوہان سے بھی ایک بشکریہ ملاقات کی اور آندھرا پردیش میں زراعت کی ترقی اور کسانوں کے مسائل پر تبادلہ خیال کیا۔ دونوں رہنماؤں نے ریاست میں دیہی ترقی کے منصوبوں کو تیز کرنے کے بارے میں بھی بات چیت کی۔