کانگریس نے پنجاب کے موجودہ حالات کے لئے مرکز اور ریاستی سرکار دونوں کو ذمہ دار ٹھہرایا

کانگریس نے دو ٹوک الفاظ میں کہا ہے کہ وہ کبھی بھی خالصتان کے حق میں نہیں ہیں اور جو کچھ پنجاب میں ہو رہا ہے اس کے لئے مرکز کی بی جے پی حکومت اور پنجاب میں بھگونت مان کی ریاستی حکومت ذمہ دار ہیں اور سب کچھ ان کی ملی بھگت کی وجہ سے ہو رہا ہے۔ واضح رہے دو دن پہلے پنجاب کے اجنالہ میں امرتپال سنگھ اپنے ساتھی لوپریت طوفان کی رہائی کے لئے پولس اسٹیشن پر قبضہ کر لیا۔ ان کی دھمکی کے بعد اگلے ہی دن لوپریت سنگھ طوفان کو عدالت سے رہائی مل گئی۔

کانگریس کے پنجاب رہنماؤں نے اس صورتحال پر تشویش کا اظہار کرتے ہوئے کہا کہ یہ دونوں حکومتوں کی ملی بھگت ہے۔ کانگریس کے رہنما پرتاپ سنگھ باجوا نے کہا کہ مرکز کے نئے قانون کے مطابق پچاس کلومیٹر تک بارڈر سیکورٹی فورس قانون کے نفاذ کے لئے ذمہ دار ہوگی۔ انہوں نے یہ بھی کہا کہ کیونکہ ایک دن قبل امرتپال سنگھ نے دھمکی دی تھی کہ اس کے حامی پولیس اسٹیشن پر دھاوا بولیں گے اور انہوں نے ایسا کیا بھی اس لئے ریاستی حکومت بھی ذمہ دار ہے۔

 پنجاب کانگریس کے ریاستی صدر امرندر سنگھ راجہ نے کہا کہ پنجاب کی آدھی فیصد آبادی سے بھی کم لوگ علیحد گی پسندگی کی بات کرتے ہیں اور زیادہ تر لوگ ہندوستان کو ہی اپنا ملک تسلیم کرتے ہیں۔ انہوں نے کہا کہ کسی کو سکھ مذہب کی تبلیغ میں کوئی رکاوٹ نہیں ہے لیکن علیحدہ رہاست کی بات کرنا قابل قبول نہیں ہے۔ انہوں نے کہا کہ پنجاب کو سیاسی قووتیں اپنے اقتدار کے لئے غلط راستے پر دھکیل رہی ہیں۔ واضح رہے پنجاب میں کانگریس کے 2500 افراد نے ملک کی سالمیت کے لئے شہادت دی ہے۔ 

اس موقع پر کانگریس حکومت کے سابق وزیر رندھاوا نے کہا کہ گرودوار پربندھک کمیٹی ان حالات کے لئے ذمہ دار ہے کیونکہ وہ وقت پر کوئی کارروائی کرنے میں ناکام رہی ہے۔ امرندر سنگھ راجہ نے کہا کہ طوفان کو گرفتاری کے اگلے دن اسے یہ کہہ کر چھوڑ دیا گیا کہ اس کے خلاف غلط ایف آئی آ ر کی گئی ہے۔ انہوں نے کہا کہ اگر غلط ایف آئی آر ہے تو اس کے لئے ریاستی حکومت نے کسی کو ذمہ دار ٹھہرایا۔ انہوں نے کہا ریاست کے وزیر اعلی ہمیشہ کی طرح اس پر بھی خاموش ہیں۔

کانگریس رہنماؤں نے اس بات پر تشویش ظاہر کی کہ اگر ریاست میں ایسا ماحول بن گیا تو سرمائے کار کیسے آئیں گے۔ انہوں نے کہا کہ یہ واقعہ اس دن پیش آیا جس دن سرمائے کاروں کا اجلاس منعقد ہو رہا تھا۔