رام مندر تعمیر کے آغاز پر 5 اگست کو ملک بھر میں جشن منائیں: وی ایچ پی

نئی دہلی: وشو ہندو پریشد (وی ایچ پی) نے رام مندر کی تعمیر کے آغاز کے موقع پر 5 اگست کو پورے ملک میں ایک تہوار کے طور پر منانے کی اپیل کی ہے۔ وی ایچ پی نے اس سلسلے میں ایک جامع ایکشن پلان تیار کیا ہے۔

وی ایچ پی کے جنرل سکریٹری ملند پرانڈے نے کہا کہ 5 اگست کو جہاں وزیر اعظم نریندر مودی ایودھیا میں بھگوان رام کے مندر کی تعمیر کے آغاز کے لئے عقیدت مند سنتوں، ٹرسٹیوں اور دیگر معززین کے ساتھ ایودھیا میں بھومی پوجن کررہے ہوں گے، پورا ملک اس منظر کو دیکھے گا۔

انہوں نے کہا کہ ہندو سماج کی سیکڑوں سال کی تمنا پوری ہونے کے اس موقع پر وشو ہندو پریشد نے تمام عقیدت مندوں سے اپیل کی ہے کہ 5 اگست کو تمام عقیدت مند اپنے گھروں اور آشرموں سے اس بھومی پوجن کا مشاہدہ کریں، آرتی اور نذرانہ پیش کریں اور پرساد بانٹیں۔

وی ایچ پی کے جنرل سکریٹری نے عقیدت مندوں کو متنبہ بھی کیا کہ مذکورہ بھومی پوجن کے پروگرام میں کورونا وائرس سے بچاؤ کی تمام تدبیریں اپنائی جائیں اور اس سلسلے میں حکومت اور انتظامیہ کی ہدایات پر عمل کریں۔