تمل ناڈو بی جے پی صدر انامالائی کے خلاف مقدمہ درج، بہاری مزدوروں پر حملے کی افواہیں اور تشدد بھڑکانے کا الزام

تمل ناڈو پولیس نے اتوار کو ریاستی بی جے پی صدر کے. انامالائی پر مقدمہ درج کیا ہے۔ بی جے پی کے ریاستی صدر کے خلاف تعزیرات ہند (آئی پی سی) کی دفعہ 153، 153 (1) (اے)، 505 (1) (بی) اور 505 (1) (سی) کے تحت مقدمہ درج کیا گیا ہے۔

قبل ازیں انامالائی نے کہا کہ حکمراں ڈی ایم کے اور اس کے اتحادی ریاست کی صورتحال کے لیے ذمہ دار ہیں۔ مقدمہ درج ہونے کے بعد ریاستی بی جے پی صدر کے. انامالائی نے ایک ٹوئٹ میں تمل ناڈو پولیس کو چیلنج کیا کہ وہ اگلے 24 گھنٹوں کے اندر انہیں گرفتار کرے۔ بی جے پی لیڈر نے کہا کہ آپ کو لگتا ہے کہ آپ جھوٹے مقدمات درج کر کے جمہوریت کو دبا سکتے ہیں۔ میں تمہیں 24 گھنٹے دیتا ہوں، مجھے چھونے کی ہمت کرو۔

ہندی اخبار دینک بھاسکر کے ایڈیٹر محمد تنویر، جو اپنے ٹوئٹر پروفائل میں خود کو صحافی بتاتے ہیں، بہار بی جے پی کے ترجمان پرشانت اور سوشل میڈیا سے جڑے شوبھم شکلا اور یوراج سنگھ راجپوت پر تامل ناڈو پولیس نے تارکین وطن پر حملوں کی افواہیں پھلانے کے الزام میں آئی پی سی کی مختلف دفعات کے تحت مقدمہ درج کیا ہے۔

وہیں بہار سے افسران کی ایک ٹیم بہاری مزدوروں پر حملے کی خبروں کی جانچ کے لیے ریاست کے تروپور پہنچ گئی ہے۔ تروپور کے ڈی سی ایس ونیت نے کہا کہ بہار حکومت کے افسران کی ایک ٹیم نے آج تروپور کا دورہ کیا۔ انہوں نے تمام اسٹیک ہولڈرز بشمول یونین ممبران، ٹریڈ یونینز اور دیگر ایسوسی ایشنز کے ساتھ بات چیت کی ہے۔ ڈی سی ایس ونیت نے کہا کہ خبریں پھیلائی جا رہی ہیں کہ تارکین وطن پر ہو رہے حملوں کی وجہ سے لوگ یہاں سے جا رہے ہیں۔ میں یہ بتانا چاہوں گا کہ ان میں سے زیادہ تر لوگ ہولی کے لیے گھر جا رہے ہیں۔

تروپور کے ایس پی ششانک سائی نے کہا کہ سٹی پولیس انتظامیہ نے ضلع پولیس انتظامیہ کے ساتھ مل کر ان میڈیا ہاؤسز اور چینلز کے خلاف ایف آئی آر درج کی ہے جو جعلی خبریں پھیلا رہے ہیں۔ ضلع پولیس کے سائبر کرائم اسٹیشن میں تین ایف آئی آر درج کی گئی ہیں۔ تحقیقات سے ہی پتہ چلے گا کہ اس یں کوئی بڑی سازش ہے یا نہیں۔ ہمارے لیے تبصرہ کرنا جلد بازی ہوگی، ضلع انتظامیہ 30,000 مہاجر مزدوروں تک پہنچ رہی ہے جو بیداری کیمپوں کے ساتھ تروپور میں کام کر رہے ہیں۔