مودی کی وداعی کی عبارت لکھے گی بمپر ووٹنگ: کمل ناتھ

بھوپال: مدھیہ پردیش کے وزیراعلی کمل ناتھ نے آج دعوی کیا کہ ریاست کی 6لوک سبھا سیٹوں پر ہوئی بمپر ووٹنگ دہلی سے وزیراعظم نریندرمودی کی وداعی کی عبارت لکھے گی۔

انہوں نے ٹویٹ کرتے ہوئے کہا کہ لوک سبھا انتخابات کے چوتھے مرحلے میں مدھیہ پردیش کی 6 لوک سبھا سیٹوں پر ہوئی بمپر ووٹنگ دہلی سے مودی کی وداعی کی عبارت لکھے گی۔سال 2014 کے مقابلےیہ بڑھی ہوئی ووٹنگ ریاست کی چار ماہ کی کانگریس حکومت کے عوامی مفاد میں کئے گئے فیصلوں کو حمایت ہے۔

اپنے ایک اور ٹوئٹ میں کمل ناتھ نے عوام کا شکریہ ادا کرتے ہوئے لکھا، ’’چوتھے مرحلہ کے لئے مدھیہ پردیش کے چھندواڑا، جبل پور، سیدھی بالا گھاٹ، منڈلا اور شہڈول میں ہوئی پولنگ میں آپ سبھی نے بڑھ چڑھ کر حصہ لیا اس کے لئے میں آپ سبھی کا شکریہ ادا کرتا ہوں۔ دیس کے دل سے دہلی تک اب ہوگی کانگریس۔‘‘

ریاست میں کل پہلے مرحلے میں چھ پارلیمانی حلقوں سیدھی ،منڈلا،بالاگھاٹ،جبل پور،شہ ڈول اور چھندواڑا میں اوسطً 68.02 فیصد ووٹنگ ہوئی ہے۔ سب سے زیادہ ووٹنگ بالاگھاٹ میں 73.72 فیصد درج کی گئی۔ اس کے علاوہ چھندواڑا میں 72.95 فیصد، منڈلا میں 70.87 فیصد، شہ ڈول میں 70.33 فیصد، جبل پور میں 64.05 فیصد اور سیدھی میں 57.32 فیصد ووٹنگ درج کی گئی۔

واضح رہے کہ منگل کے روز راہل گاندھی نے مدھیہ پردیش میں تین ریلیوں سے خطاب کیا۔ دریں اثنا مدھیہ پردیش کے وزیر اعلیٰ کمل ناتھ نے ٹوئٹر اپنی اور کانگریس صدر راہل گاندھی کی تصویر پوسٹ کی۔ یہ تصویر جتارا سے پتھاریا جاتے وقت لی گئی ہے جس میں دونوں رہنما ہیلی کاپٹر میں موجود ہیں۔