بجٹ اجلاس: ایوان بالا میں گنگا کی صفائی کا معاملہ اٹھایا گیا

نئی دہلی: دریائے گنگا کی ناگفتہ بہ حالت پر تشویش کا اظہار کرتے ہوئے بدھ کو ایوان بالا راجیہ سبھا میں گنگا کی صفائی سے متعلق قومی گنگا پروجیکٹ پر سوال اٹھایا گیا۔ کانگریس کے کمار کیتکر نے ایوان میں وقفہ صفر کے دوران یہ مسئلہ اٹھایا اور کہا کہ حکومت نے کہا تھا کہ اس پروجیکٹ کے تحت سال 2019 تک گنگا کو مکمل طور پر صاف کر دیا جائے گا، لیکن گنگا کی حالت اب بھی بہت خراب ہے۔

انہوں نے کہا کہ اس کے لیے جو ادارہ بنایا گیا ہے اس کی سربراہی خود وزیراعظم کر رہے ہیں، اس کے باوجود حالت ٹھیک نہیں۔ رکن ایوان نے کہا کہ کورونا وبا کے دوران گنگا میں لاشیں تیرتی تھیں۔ انہوں نے کہا کہ گنگا کی صفائی پر پیسہ خرچ کرنے کے بجائے پوجا پر زیادہ خرچ کیا جا رہا ہے۔ انہوں نے کہا کہ وہ حکومت سے جاننا چاہتے ہیں کہ اس پروجیکٹ کے لیے کتنی رقم مختص کی گئی اور اب تک کتنی رقم خرچ ہو چکی ہے۔

پاکستان کی سمندری ایجنسیوں کے ذریعہ گجرات سے ماہی گیروں کی گرفتاری کا معاملہ اٹھاتے ہوئے کانگریس کے شکتی سنگھ گوہل نے کہا کہ ایک ہفتے میں پاکستانی ایجنسیوں نے گجرات سے تین کشتیوں اور 27 ماہی گیروں کو گرفتار کیا ہے۔ انہوں نے کہا کہ ان ماہی گیروں کو جیلوں میں ڈال کر ان کی کشتیوں کا سامان چرالیا جاتا ہے، جس کی وجہ سے لاکھوں روپے قرض لے کر کشتیاں بنانے والے ماہی گیر بری طرح متاثر ہو رہے ہیں۔ انہوں نے کہا کہ اس وقت 643 ماہی گیر پاکستانی جیلوں میں بند ہیں اور حکومت کو کسی نہ کسی طرح ان کی رہائی کے انتظامات کرنے چاہئیں۔

کمیونسٹ پارٹی آف انڈیا مارکسسٹ کے جوش کے منی نے کیرالہ میں جنگلی جانوروں کی دہشت کا مسئلہ اٹھاتے ہوئے کہا کہ حال ہی میں ایک ہاتھی نے اپنے والدین کے ساتھ سڑک پر جا رہی ایک لڑکی کو سب کے سامنے مار ڈالا۔ آر جے ڈی کے اے ڈی سنگھ نے افغانستان کے طلباء کو ویزا جاری کرنے کا معاملہ اٹھاتے ہوئے کہا کہ افغان عوام کی ہندوستان کے تئیں خیر سگالی ہے اس لئے ہندوستان کو ان کی مدد کرنی چاہئے۔ انہوں نے کہا کہ فوج میں افغانوں کی رجمنٹ بنا کر انہیں کشمیر میں تعینات کیا جا سکتا ہے۔

مارکسسٹ وی شیواداسن نے کووڈ کے زمانے میں طلبہ کے لیے فیلوشپ کی کمی کا ذکر کرتے ہوئے کہا کہ اس سے ان طلبہ کی مشکلات میں اضافہ ہوا ہے جو پہلے ہی بحران کا سامنا کر رہے ہیں۔ بی جے پی کی سیما دویدی نے مطالبہ کیا کہ پارلیمنٹ میں لتا منگیشکر کی آئل پینٹنگ لگائی جائے۔ بی جے پی کے برج لال دویدی نے پولیس میڈلز کے ساتھ دی جانے والی رقم میں اضافے کا مسئلہ اٹھایا۔