بی ایس پی مختار انصاری سمیت کسی بھی مافیا کو اسمبلی انتخابات میں امیدوار نہیں بنائے گی، مایاوتی کا اعلان

لکھنؤ: یوپی میں اگلے سال ہونے جا رہے اسمبلی انتخابات سے قبل بی ایس پی سپریمو مایاوتی نے جمعہ کے روز ایک اہم اعلان کر دیا۔ مایاوتی نے کہا کہ ان کی کوشش ہے کہ پارٹی سے کسی زورآور یا مافیا کو امیدوار نہ بنایا جائے، اسی کے پیش نظر بی ایس پی آئندہ انتخابات میں مختار انصاری کو ٹکٹ نہیں دے گی، بلکہ بی ایس پی کے ریاستی صدر بھیم راج بھر، مؤ اسمبلی سیٹ سے پارٹی کے امیدوار ہوں گے۔

فیصلے کے بارے میں معلومات دیتے ہوئے بی ایس پی سپریمو مایاوتی نے ٹویٹ کیا، ’’بی ایس پی کی کوشش آئندہ یوپی اسمبلی کے انتخابات میں یہ رہے گی کہ پارٹی سے کسی بھی زورآور اور مافیا وغیرہ کو امیدوار نہ بنایا جائے۔ اس کے پیش نظر اب اعظم گڑھ منڈل کی مؤ اسمبلی سیٹ سے مختار انصاری کا نام نہیں بلکہ بی ایس پی کے ریاستی صدر بھیم راج بھر کا نام فائنل کیا گیا ہے۔‘‘

انہوں نے مزید لکھا ، ’’عوام کی توقعات پر پورا اترنے کے لیے گئے اس فیصلہ کے نتاظر میں تمام پارٹی انچارجوں سے اپیل ہے کہ وہ پارٹی امیدواروں کا انتخاب کرتے وقت اس بات کا خاص خیال رکھیں، تاکہ حکومت کی تشکیل کی صورت میں اس طرح کے عناصر کے خلاف سخت کارروائی کرنے میں کوئی دقت پیش نہ آئے۔‘‘

مایاوتی نے ایک اور ٹویٹ میں لکھا، ’’بی ایس پی کا عزم قانون کے ذریعے قانون کا راج‘ کے ساتھ یوپی کی تصویر کو بھی تبدیل کرنے کا ہے تاکہ نہ صرف ریاست اور ملک بلکہ ہر بچہ کہے کہ اگر حکومت ہو تو بہن جی کی۔ بی ایس پی جو کہتی ہے اسے کر کے بھی دکھاتی ہے، یہی پارٹی کی اصل شناخت ہے۔‘‘