برج بھوشن کو خاتون پہلوانوں کے جنسی استحصال معاملہ میں عدالت سے ملی ضمانت، آئندہ سماعت 28 جولائی کو

پہلوانوں کے جنسی استحصال معاملے میں آج بی جے پی رکن پارلیمنٹ اور ریسلنگ فیڈریشن آف انڈیا (ڈبلیو ایف آئی) کے سربراہ برج بھوشن شرن سنگھ کو عدالت سے ضمانت مل گئی۔ دہلی کے راؤز ایوینیو ضلع کورٹ نے 25 ہزار روپے مچلکہ پر برج بھوشن کو یہ ضمانت دی ہے اور اس معاملے پر آئندہ سماعت کے لیے 28 جولائی کی تاریخ مقرر کی ہے۔ خاتون پہلوانوں کی جنسی ہراسانی معاملے میں برج بھوشن کے ساتھ ساتھ شریک ملزم ونود تومر کو بھی ضمانت مل گئی ہے۔

اس سے قبل آج دوپہر راؤز ایوینیو کورٹ جج نے ملزم اور فریق استغاثہ کے وکلاء کے ساتھ ساتھ شکایت دہندگان کی دلیلیں بھی سننے کے بعد فیصلہ کو محفوظ رکھ لیا تھا اور بتایا تھا کہ 4 بجے فیصلہ سنایا جائے گا۔ سماعت مکمل ہونے کے بعد عدالت نے کہا تھا کہ دہلی پولیس کے وکیل نے واضح کیا ہے کہ وہ ضمانت کی نہ تو مخالفت کر رہے ہیں اور نہ ہی حمایت۔ ان کا صرف اتنا کہنا ہے کہ اس پر قانون کے تحت کارروائی کی جائے گی۔

آج دوپہر ہوئی سماعت کے دوران دہلی پولیس کی نمائندگی کر رہے سرکاری وکیل نے عدالت سے کہا کہ ملزمین پر قانون کے مطابق مقدمہ چلایا جائے اور راحت دیئے جانے پر کچھ شرطیں عائد کی جائیں۔ انھوں نے عدالت سے یہ بھی کہا کہ درخواست کو قانون اور سپریم کورٹ کے ذریعہ پاس احکام کے مطابق نمٹایا جانا چاہیے۔

اس موقع پر شکایت دہندہ کی جانب سے پیش وکیل نے ضمانت کی درخواست کی مخالفت کرتے ہوئے کہا کہ ملزم بہت بااثر ہے۔ انھیں ضمانت دینے سے پہلے بہت غور کیا جانا چاہیے، اور اگر ضمانت دی جاتی ہے تو سخت شرائط عائد کی جانی چاہئیں۔ اس تعلق سے برج بھوشن کے وکیل نے عدالت سے کہا کہ وہ سبھی شرائط پر عمل کریں گے۔ انھوں نے عدالت سے بتایا کہ کوئی دھمکی وغیرہ نہیں ہوگی سبھی شرطوں پر عمل کرنے کا وعدہ کر رہا ہوں۔