نابالغ نے دوست سے پیسوں پر لڑائی کے بعد ہوائی جہاز میں بم کی افواہ اڑائی!

ممبئی پولیس نے بدھ کو چھتیس گڑھ سے ایک نابالغ کو حراست میں لیا، جس پر مختلف ایئر لائنز کو بم کی جھوٹی دھمکیاں دینے کا الزام ہے۔ پولیس کا کہنا ہے کہ انہیں ممبئی آنے والی کچھ پروازوں پر بم کی دھمکیوں کی شکایات موصول ہوئی تھیں۔ یہ دھمکیاں کچھ سوشل میڈیا پوسٹس کے ذریعے دی گئیں۔

تحقیقات کے دوران پتہ چلا کہ یہ پوسٹ چھتیس گڑھ کے ایک نابالغ نے کی تھی۔ اس پر کارروائی کرتے ہوئے پولیس نے نابالغ کو حراست میں لیا اور اس کے والدین کو اطلاع دینے کے بعد اسے جوینائل جسٹس بورڈ کے حوالے کر دیا۔

نیوز پورٹل ’اے بی پی‘ پر شائع خبر کے مطابق ابتدائی تفتیش میں پتہ چلا ہے کہ نابالغ اور اس کے دوست کے درمیان رقم کو لے کر جھگڑا ہوا تھا۔ اس تنازعہ کی وجہ سے نابالغ نے اپنے دوست کی تصویر کا استعمال کرتے ہوئے سوشل میڈیا پر دھمکی آمیز پوسٹس کیں۔ مختلف معاملات کے حوالے سے تین ایف آئی آر درج کی گئی ہیں۔

فی الحال، پولیس اس بات کی تحقیقات کر رہی ہے کہ آیا یہ معاملہ حال ہی میں موصول ہونے والے دیگر جھوٹے بم کی دھمکی کے کیسوں سے متعلق ہے۔ گزشتہ تین دنوں میں اندرون ملک اور بین الاقوامی روٹس پر چلنے والی تقریباً ایک درجن ہندوستانی پروازوں کو بم کی جھوٹی دھمکیاں موصول ہوئی ہیں۔

اس معاملے نے سیکیورٹی ایجنسیوں کو ایلرٹ کردیا ہے اور ایئرپورٹس پر بھی سیکیورٹی بڑھا دی گئی ہے۔ اس واقعے نے سیکورٹی اور مسافروں کی حفاظت کے حوالے سے تشویش کو جنم دیا۔ پولیس اب یہ جاننے کی کوشش کر رہی ہے کہ آیا نابالغ کی طرف سے دی گئی دھمکی کا مقصد اس کے دوست کو بدنام کرنا تھا یا اس کے پیچھے کوئی اور وجہ تھی۔