زائرہ وسیم کی چوبیس گھنٹے بعد ٹویٹر اور انسٹاگرام پر واپسی

جموں وکشمیر کے گرمائی دارالحکومت سری نگر سے تعلق رکھنے والی سابق بالی وڈ اداکارہ زائرہ وسیم نے اپنے ذاتی ٹویٹر اور انسٹاگرام اکائونٹس کو ڈی ایکٹیویٹ کرنے کے چوبیس گھنٹے بعد دوبارہ ایکٹیویٹ کردیا ہے۔

موصوفہ نے ریگستانی ٹڈیوں کے فصلوں اور باغوں پر حملوں کو ایک قرآنی آیت کی وساطت سے جواز بخشنے پر زبردست تنقید کا نشانہ بننے کی وجہ سے اپنے ذاتی ٹویٹر اور انسٹاگرام اکائونٹس کو جمعہ کے روز غیر متحرک کردیا تھا۔

بتادیں کہ موصوفہ نے چند روز قبل اپنے سوشل میڈیا اکائونٹس پر قرآن کی ایک آیت شئیر کی تھی جس کا سہارا لیکر وہ بظاہر یہ کہنا چاہتی تھیں کہ گمراہوں پر ٹڈیوں کے جھنڈ کا حملہ آور ہونا اللہ تعالیٰ کی طرف سے ایک عذاب ہے۔

زائرہ وسیم کی یہ سوشل میڈیا پوسٹ نہ صرف گرم بحث و مباحثے کا موضوع بن گئی تھی بلکہ اس پر مذمتی اور تنقیدی تحریوں کا اس قدر تیز سیلاب امڈ آیا کہ انہیں اپنے ٹویٹر اور انسٹاگرام اکاؤنٹس غیر متحرک کرنے پڑے تھے۔اگرچہ بعض سوشل میڈیا صارفین نے حمایتی تحریروں سے موصوف اداکارہ کی حمایت کی لیکن تنقید کرنے والوں کی تعداد زیادہ تھی۔

ایک ٹویٹر صارف نے اپنے ایک ٹویٹ میں کہا تھا: 'میں زائرہ وسیم کو پسند کرتا ہوں لیکن ان کی یہ بات بالکل بے مزہ ہے۔ لوگ ٹڈیوں، سیلابوں اور کووڈ سے پریشان ہیں اور وہ اس کو اللہ کی طرف سے سزا قرار دے رہی ہیں'۔

زائرہ وسیم نے ہفتے کو اپنے ٹویٹر اور انسٹاگرام اکائونٹس کو دوبارہ ایکٹیویٹ کے بعد ایک ٹویٹ کہ 'زائرہ نے اپنا ٹویٹر اکائونٹ کیونکر ڈی ایکٹیویٹ کیا ہے' کے جواب میں لکھا: 'کیونکہ باقیوں کی طرح میں بھی ایک انسان ہوں۔ جب شور حد سے زیادہ بڑھ جاتا ہے تو مجھے بھی بریک لینے کی اجازت ہے'۔

زائرہ وسیم کو ٹویٹر پر قریب پونے دو لاکھ صارفین فالو کرتے ہیں جبکہ وہ خود صرف 78 صارفین کو ہی فالو کرتی تھیں۔ ان کے انسٹاگرام پر قریب آٹھ لاکھ فالورس ہیں جبکہ وہ خود کسی کو بھی فالو نہیں کرتی ہیں۔ تاہم زائرہ وسیم نے اپنے فیس بک پیج، جس پر ان کے زائد از دو لاکھ 80 ہزار فالورس ہیں، کو غیر متحرک نہیں کیا تھا۔

قابل ذکر ہے کہ کشمیری اداکارہ زائرہ وسیم نے سال گذشتہ کے جون میں بالی وڈ کی دنیا سے اچانک کنارہ کشی کرکے لوگوں کو ورطہ حیرت میں ڈال دیا تھا۔انیس سالہ زائرہ وسیم جنہوں نے اپنے مختصر فلمی کیریئر کے دوران تین بالی وڈ فلموں 'دنگل، سیکرٹ سوپر سٹار اور دی سکائی از پنک میں اپنی اداکاری کے جوہر دکھائے ہیں، نے فلمی دنیا کو خیر باد کہنے کا اعلان اپنے تمام سوشل میڈیا کھاتوں پر اپنی ایک طویل تحریر میں کیا تھا۔

انہوں نے تب اپنے فیصلے کو صحیح ثابت کرنے کے لئے بھی قرآن کی متعدد آیات، پیغمبر اسلام حضرت محمد مصطفی صلی اللہ علیہ و آلہ وسلم اور خلیفہ دوم حضرت عمر رضی اللہ تعالیٰ عنہ کے اقوال کا سہارا لیا تھا۔

زائرہ وسیم گذشتہ ایک برس سے اپنے سوشل میڈیا اکائونٹس پر دین اسلام کے متعلق مواد ہی اپ لوڈ کرتی تھیں۔ اس دوران بیچ بیچ میں انہوں نے کشمیر کی صورتحال پر بھی کھل کر لکھا۔ یہاں یہ بات بھی قابل ذکر ہے کہ پاکستان سے ٹڈیوں کے بڑے بڑے جھنڈ مغربی اور وسطی ہندوستان میں داخل ہوگئے ہیں اور فصلوں کو تباہ کررہے ہیں۔

اقوام متحدہ کی تنظیم برائے خوراک اور زراعت کے مطابق 40 لاکھ ٹڈیوں کا ایک جھنڈ 35 ہزار افراد کی خوراک تباہ کرسکتا ہے۔ ہوا میں اڑنے والی ان ٹڈیوں کا ایک جھنڈ دس ارب ٹڈیوں پر مشتمل ہوسکتا ہے جو سینکڑوں کلو میٹر رقبے میں پھیل سکتی ہیں۔