لوک سبھا انتخاب میں بی جے پی 150 سے 175 سیٹیں ہی جیت پائے گی! شتروگھن سنہا

تجربہ کار سیاست داں، بالی ووڈ اسٹار اور ترنمول کانگریس (ٹی ایم سی) کے لیڈر شتروگھن سنہا نے بی جے پی پر سخت حملہ کیا ہے۔ انگریزی روزنامہ ’انڈیا ایکسپریس‘ سے بات کرتے ہوئے انہوں نے کہا ہے کہ بی جے پی کا یہ دعویٰ کہ لوک سبھا انتخابات میں وہ 400 پار کرے گی؟ غلط ثابت ہونے والا ہے۔ اسی طرح کا نعرہ اس نے دہلی، کرناٹک و مغربی بنگال کے اسمبلی الیکشن کے دوران بھی لگایا تھا لیکن اسے ذلت آمیز ناکامی ملی تھی۔ اس بار بھی اس کے ہاتھ بری طرح ناکامی ہی آئے گی اور وہ 150 سے 175 سیٹوں کے درمیان سمٹ جائے گی۔

شترگھن سنہا ایک بار پھر اپنی پارٹی کے ٹکٹ پر آسنسول سیٹ سے الیکشن لڑ رہے ہیں۔ انہوں نے 2022 میں آسنسول پارلیمانی حلقہ کے ضمنی انتخاب میں 3 لاکھ سے زیادہ ووٹوں سے کامیابی حاصل کی تھی۔ اس بار ان کا سامنا سینئر بی جے پی لیڈر ایس ایس اہلووالیا سے ہے۔

سندیش خالی معاملے پر انہوں نے کہا کہ بی جے پی نے سندیش خالی کے بارے میں بہت بات کی لیکن ٹی ایم سی کے قومی جنرل سکریٹری ابھیشیک بنرجی نے اس کی پوری سچائی لوگوں کے سامنے لادی۔ اسٹنگ آپریشن سے یہ بات سامنے آئی ہے کہ کس طرح بی جے پی نے سندیش خالی میں الزامات گڑھنے کے لیے پیسوں کا استعمال کیا۔ حیرت کی بات یہ ہے کہ وہ ابھی تک پرجول ریونّا کے خلاف جنسی استحصال کے الزامات پر خاموش ہے۔

اس سوال کا جواب دیتے ہوئے کہ کیا اس بار لوک سبھا انتخابات کے دوران بی جے پی کو 400 سے زیادہ سیٹیں ملیں گی؟ انہوں نے کہا کہ بی جے پی نے بنگال اسمبلی انتخابات کے دوران بھی ’اب کی بار 200 پار‘ کا نعرہ دیا تھا لیکن ٹی ایم سی نے 200 سے زیادہ سیٹیں حاصل کی تھی۔ بی جے پی اسی طرح کا نعرہ دہلی اور کرناٹک کے انتخابات کے دوران بھی دیا تھا لیکن وہ اس میں بھی بری طرح ناکام رہی تھی۔ اس بار بھی بی جے پی کو مایوسی کا سامنا کرنا پڑے گا۔ وہ لوک سبھا انتخابات میں صرف 150 سے 175 سیٹیں ہی جیت رہی ہے۔

ٹی ایم سی کے خلاف بدعنوانی کے الزامات پر بات کرتے ہوئے انہوں نے کہا کہ یہ صرف الزامات ہیں اور ان کی تحقیقات ہو رہی ہیں۔ ابھی تک کچھ ثابت نہیں ہوا۔ بی جے پی نے ابھی تک انتخابی بانڈ کے معاملے پر کوئی بات نہیں کی ہے۔ یہ دنیا کے سب سے بڑے گھوٹالوں میں سے ایک ہے لیکن بی جے پی لیڈر اور ترجمان اس پر خاموش ہیں۔ میں دوسروں پر الزام لگا کر خود کو درست ثابت کرنے کی کوشش نہیں کر رہا ہوں لیکن بی جے پی کو پہلے اس معاملے پر بات کرنی چاہیے۔