مہاراشٹر میں بھی بی جے پی کا صفایا ہو جائے گا: پٹولے

ممبئی: مہاراشٹر پردیش کانگریس کمیٹی (ایم پی سی سی) کے صدر نانا پٹولے نے کہا ہے کہ بھارتیہ جنتا پارٹی (بی جے پی) کا آئندہ لوک سبھا اور ریاستی اسمبلی انتخابات میں اسی طرح صفایا ہو جائے گا جس طرح کرناٹک میں ہوا ہے۔ نانا پٹولے کرناٹک اسمبلی انتخابات میں پارٹی کی شاندار جیت کے بعد جشن منا رہے ریاستی کانگریس ہیڈکوارٹر میں پرجوش کارکنوں سے خطاب کر رہے تھے۔ اس دوران کانگریس کارکنوں نے ڈھول کی تھاپ پر رقص کرتے ہوئے مٹھائیاں تقسیم کیں۔

نانا پٹولے نے کہا کہ راہل گاندھی کی بھارت جوڑو یاترا نے ملک کی سیاست کا رخ بدل دیا ہے اور اس کا اثر کرناٹک انتخابات کے نتائج میں دیکھا گیا ہے۔ کرناٹک کے عوام نے "دہلی کے کرپٹ ڈبل انجن" اور 40 فیصد "لوٹ" کو شکست دے کر تعصب اور آمریت کو مسترد کرتے ہوئے کانگریس پارٹی کو فتح دلائی ہے۔