بی جے پی انتخاب سے قبل اپوزیشن کے سبھی لیڈران کو گرفتار کرنا چاہتی ہے: ممتا بنرجی

دہلی آبکاری پالیسی سے جڑے منی لانڈرنگ معاملے میں دہلی کے وزیر اعلیٰ اروند کیجریوال کو ای ڈی کا سمن بھیجے جانے پر کئی اپوزیشن لیڈران نے مرکزی حکومت کو تنقید کا نشانہ بنایا ہے۔ مغربی بنگال کی وزیر اعلیٰ ممتا بنرجی نے بھی اس معاملے میں اپنا رد عمل ظاہر کرتے ہوئے مودی حکومت پر حملہ کیا ہے۔ انھوں نے اپنے بیان میں ایپل کے ذریعہ فون ہیکنگ کو لے کر بھیجے گئے الرٹ اور منریگا کی بقایہ رقم کا بھی ایشو اٹھایا۔ منریگا معاملے پر ممتا کا کہنا ہے کہ اگر 16 نومبر تک منریگا کی بقایہ رقم ادا نہیں کی گئی تو ہم اپنے اگلے قدم کا اعلان کریں گے۔

کیجریوال کو ای ڈی کے ذریعہ بھیجے گئے نوٹس معاملے پر ممتا نے کہا کہ ’’اروند کیجریوال کو نوٹس بھیجا گیا ہے۔ کئی لیڈران کو نوٹس بھیجا گیا ہے۔ بی جے پی کا منصوبہ 2024 کے انتخاب سے پہلے سبھی اپوزیشن لیڈران کو گرفتار کرنے کا ہے۔ وہ خالی ملک میں اپنے لیے ووٹ چاہتے ہیں۔‘‘ ساتھ ہی انھوں نے کہا کہ ’’6-5 اراکین پارلیمنٹ کہہ رہے ہیں کہ ان کا فون ہیک ہوا ہے۔ ایسے میں باہر کے لوگ ہمارے ملک کے بارے میں کیا سوچیں گے۔ ملک کو ہم کبھی چھوٹا نہیں کر سکتے۔‘‘

قابل ذکر ہے کہ ای ڈی نے اروند کیجریوال کو پوچھ تاچھ کے لیے 2 نومبر کو طلب کیا ہے۔ عام آدمی پارٹی (عآپ) کا اس معاملے میں دعویٰ ہے کہ کیجریوال کو ای ڈی گرفتار کر سکتی ہے۔ دہلی حکومت میں وزیر آتشی کا کہنا ہے کہ ’’ایسی خبر ہے کہ کیجریوال کو 2 نومبر کو گرفتار کر لیا جائے گا۔ اگر انھیں گرفتار کیا جاتا ہے تو اس کے پیچھے بدعنوانی (الزام) وجہ نہیں ہوگی بلکہ بی جے پی کے خلاف آواز اٹھانا اصل وجہ ہوگی۔‘‘