مودی حکومت میں بے تحاشہ مہنگائی کے خلاف یوتھ کانگریس کا ’ہلّا بول‘

ہندوستان میں بڑھتی مہنگائی سے عوام بے حال ہیں۔ پٹرول، ڈیزل اور گیس کی قیمتوں میں اضافہ کو لے کر آج یوتھ کانگریس کارکنان نے پٹرولیم وزارت کے باہر احتجاجی مظاہرہ کیا۔ یوتھ کانگریس نے کہا کہ بی جے پی لگاتار پٹرول-ڈیزل کی قیمتوں میں اضافہ کر متوسط اور غریب طبقہ کے لوگوں کو لوٹنے پر آمادہ ہے۔ بی جے پی جب سے اقتدار میں آئی ہے ہندوستانی عوام کو بس لوٹنے کا ہی کام کیا ہے۔ عام آدمی ہو یا چھوٹا کاروباری، ہر کسی پر مودی حکومت مہنگائی کا حملہ کر رہی ہے۔

یوتھ کانگریس کے قومی صدر شرینواس بی وی نے کہا کہ ’’مودی حکومت کے مہنگے دنوں سے ہندوستانی عوام نجات چاہ رہی ہے۔ بی جے پی کے اچھے دن اب مہنگے دن ثابت ہو رہے ہیں۔ غریب عوام ایل پی جی خریدتے وقت مہنگائی کے آنسو رو رہی ہے۔‘‘ انھوں نے مزید کہا کہ ’’عوام کہہ رہی ہے کہ ایسے ’اچھے دن‘ واپس لے لیجیے اور ہمیں ہمارے ’برے دن‘ ہی لوٹا دیجیے۔ ہندوستانی باشندے مجبوراً مہنگی چیزیں خرید کر نام نہاد ’اچھے دن‘ کی قیمت ادا کر رہے ہیں۔ ہندوستانی عوام ایسے نام نہاد ’اچھے دن‘ سے نجات چاہتی ہے۔‘‘

مہنگائی کے خلاف سڑک پر اتر کر مظاہرہ کر رہے کانگریس کارکنان کا کہنا ہے کہ ملک کے عوام پہلے سے ہی بے روزگاری، معاشی لاچاری اور زبردست مہنگائی کا سامنا کر رہے ہیں، 97 فیصد کنبہ کی آمدنی میں پہلے ہی کمی آ چکی ہے۔ ایسے میں لوگوں کو راحت دینے کی جگہ حکومت عوام کو مہنگائی کی چکی میں پھنسا کر پیس رہی ہے۔