رام مندر تعمیر: بی جے پی رکن اسمبلی نے قانون توڑنے کی دی دھمکی

ایودھیا میں رام مندر تعمیر کا معاملہ دھیرے دھیرے اشتعال انگیز شکل اختیار کرتا ہوا محسوس ہو رہا ہے۔ 25 نومبر کو یہاں وی ایچ پی کی ’دھرم سبھا‘ منعقد ہونی ہے اور آر ایس ایس، وی ایچ پی کے ساتھ ساتھ بی جے پی لیڈران و کارکنان بھی متنازعہ بیان دے کر آگ میں گھی ڈالنے کا کام کر رہے ہیں۔ تازہ بیان اتر پردیش واقع بلیا کے بیریا سے بی جے پی رکن اسمبلی سریندر سنگھ کا ہے جنھوں نے کہا ہے کہ ’’میں 25 نومبر کو اپنے حامیوں کے ساتھ وی ایچ پی کی دھرم سبھا میں شامل ہونے جا رہا ہوں۔ رام مندر تعمیر کے معاملے پر اگر حالات بگڑتے ہیں یا آئین کو ہاتھ میں لینے کی نوبت آتی ہے تو وہ اس سے پیچھے نہیں ہٹیں گے۔‘‘

سریندر سنگھ نے رام مندر تعمیر کے لیے ہونے والی دھرم سبھا کے تعلق سے کہا کہ ’’25 نومبر 2018 کو ایودھیا میں کثیر تعداد میں رام بھکت جمع ہو رہے ہیں۔ اگر ضرورت پڑی تو 1992 کی تاریخ دہرائی جائے گی اور آئین توڑ کر کروڑوں ہندوؤں کی عقیدت کو دھیان میں رکھتے ہوئے رام مندر تعمیر کا کام شروع ہوگا۔‘‘

واضح رہے کہ 25 نومبر کو وی ایچ پی نے رم مندر تعمیر کے معاملے پر ’دھرم سبھا‘ بلائی ہے جس کی تیاریاں زور و شور سے چل رہی ہیں۔ وی ایچ پی نے دعویٰ کیا ہے کہ اس دھرم سبھا میں 1 لاکھ سے زیادہ لوگ شرکت کریں گے۔ شیو سینا سربراہ اُدھو ٹھاکرے بھی 24 نومبر کو ایودھیا پہنچ رہے ہیں۔ شیو سینا لگاتار رام مندر کا ایشو اٹھا رہی ہے اور اس معاملے میں مودی حکومت کو بھی نشانہ بنانے سے باز نہیں آ رہی۔