ایس ڈی ایم کو دھمکی دینے کے معاملہ میں بی جے پی کے رکن اسمبلی کو دو سال قید کی سزا

بہرائچ: اتر پردیش کے بہرائچ ضلع کی مہاسی سیٹ سے بی جے پی کے رکن اسمبلی سریشور سنگھ کو ایس ڈی ایم (سب ڈویزنل مجسٹریٹ) کو دھمکی دینے کے 21 سال پرانے معاملہ میں دو سال قید کی سزا سنائی گئی ہے۔ ارکان اسمبلی اور ارکان پارلیمنٹ کے خلاف معاملوں کی سماعت کے لیے قائم ایک خصوصی عدالت نے سزا سنائی۔ سول جج جونئر ڈویزن اور اے سی جے ایم ایم پی/ایم ایل اے کورٹ انوپم دیکشت نے اس معاملہ کی سماعت کی۔

مقدمہ کی سماعت کے دوران ایس ڈی ایم کے بیان کے علاوہ دیگر ثبوتوں پر بھی غور کیا گیا۔ عوامی نمائندگی قانون 1951 کے مطابق دو سال یا اس سے زیادہ کی قید کی سزا پانے والے کسی بھی عوامی نمائندہ کو سزا کی تاریخ سے ہی نااہل قرار دیا جاتا ہے اور سزا پوری ہونے کے بعد آئندہ چھ برسوں تک اس کے انتخاب لڑنے پر پابندی عائد کر دی جاتی ہے۔

ڈسٹرکٹ گورمنٹ کونسل (کریمنل) منو لال مشرا نے جمعہ کو بتایا کہ عدالت نے سزا سنائے جانے کے بعد رکن اسمبلی کو فیصلے کے خلاف اپیل دائر کرنے کے لیے ضمانت دے دی۔ یہ حکم 4 جنوری کو سنایا گیا تھا، جس کی نقل جمعہ کو دستیاب ہو سکی۔

ستمبر 2002 کو مہاسی تحصیل کے ایس ڈی ایم لال منی مشرا نے ہردی تھانہ میں 2 ارکان اسمبلی کے خلاف معاملہ درج کرایا تھا۔ انہوں نے الزام عائد کیا تھا کہ سریشور سنگھ نے ایس ڈی ایم دفتر میں داخل ہو کر سرکاری کام میں رخنہ اندازی کی اور ایس ڈی ایم کے ساتھ بدسلوکی کرتے ہوئے انہیں دھمکی دی تھی۔

چار جنوری کو ایم پی/ایم ایل اے کورٹ کے جج انوپم دیکشت نے رکن اسمبلی کو 2 سال قید اور ڈھائی ہزار روپے جرمانہ کی سزا سنائی۔ حکم کے مطابق، جرمانہ ادا نہ کرنے پر انہیں مزید سات دن تک قید میں رہنا ہوگا۔ سزا سنائے جانے کے بعد رکن اسمبلی سریشور سنگھ کو اپنے فیصلے کے خلاف اپیل دائر کرنے کے لیے ضمانت دے دی۔