ہندووادی رہنما کا کارنامہ، پاکستانی گیت کو چرا کر گیت کے خالق کو ہی بتا دیا ’چور‘!

حیدرآباد: بی جے پی کے رکن اسمبلی اور مسلمانوں کے خلاف اکثر زہر اگلنے والے شعلہ بیاں رہنما راجہ سنگھ نے پاکستان کے ایک گیت کی نقل کی اور خود کو اس کا خالق بتا دیا اور جب ٹوئٹر پر ان کی پول کھل گئی تو انہوں نے گیت کے خالق کو ہی چور قرار دے دیا۔

تلنگانہ سے تعلق رکھنے والے بی جے پی کے رکن اسمبلی اور پاکستانی مسلح افواج کے ترجمان کے ٹوئٹر پر ریمارک کے بعد جنگ چھڑ گئی اور یہ معاملہ موضوع بحث بن گیا۔ ایک طرف زعفرانی جماعت کے رکن اسمبلی کا کہنا ہے کہ یہ گیت انہوں نے لکھا ہے تو دوسری طرف اس ترجمان نے دعوی کیا ہے کہ اس گیت کی چوری کی گئی ہے۔ گوشہ محلہ حلقہ اسمبلی کی نمائندگی کرنے والے رکن اسمبلی نے پاک مسلح افواج کے ترجمان میجر آصف غفور کے الزام کی تردید کی اور کہا کہ انہوں نے پاکستان جیسے دہشت گرد ملک کے کسی گیت کی نقل نہیں کی ہے۔ راجہ سنگھ نے رام نومی کے موقع پر ہندوستانی افواج کو یہ ایک منٹ کا گیت معنون کیا تھا اور یہ گیت اپنے ٹوئٹر ہینڈل پر پوسٹ کیا تھا۔ جس میں خود کو گیت گاتا ہوا دکھایا تھا۔

بی جے پی کے لیڈر نے 12 اپریل کو اس گیت کو پوسٹ کیا اور کہا تھا کہ ہندوستانی مسلح افواج کے نام یہ گیت رام نومی کے موقع پر جاری کیا گیا ہے۔ راجہ سنگھ کی جانب سے ٹوئٹر پر اس گیت کو پوسٹ کرنے کے ساتھ ہی پڑوسی ملک کے کئی لوگوں نے دعوی کیا کہ راجہ سنگھ نے اس گیت کی چوری کی ہے اور یہ گیت دراصل 23 مارچ کو یوم پاکستان کے موقع پر جاری کیا گیا تھا۔

میجر جنرل غفور نے اس سلسلہ میں ٹوئٹ کرتے ہوئے کہا تھا کہ ہندوستانی سیاستداں نے پاکستانی فوج کے بارے میں تحریر کردہ گیت کو چرایا اور اسے ہندوستانی فوج سے منسوب کردیا۔ پاکستانی فوج نے اس گیت کو اپ لوڈ کرنے پر تبصرہ کرتے ہوئے بی جے پی رکن اسمبلی سے کہا تھا کہ وہ سچ بولنے میں بھی پاکستان کی نقل کریں۔

اس پر راجہ سنگھ نے ردعمل دیتے ہوئے کہا تھا کہ پاکستانی گلوکار ان کے گیت کو نقل کر رہے ہیں۔ حالانکہ پاکستانی میڈیا میں یہ گیت تقریباً تین ہفتہ پہلے جاری کیا گیا تھا۔ راجہ سنگھ نے کہا کہ ’’مجھے پاکستان جیسے دہشت گرد ملک کی کسی بھی چیز کی نقل کرنے کی کوئی ضرورت نہیں۔ پاکستانی تو خود ہندوستانی گیتوں کی نقل کرتے ہیں۔‘‘

واضح رہے کہ راجہ سنگھ نے اس گیت کو لفظ بہ لفظ نقل کیا اور صرف پاکستان زندہ باد کے بجائے ہندوستان زندہ باد کے الفاظ استعمال کیے۔ یہ گیت پاکستانی فنکار ساحر علی بگا نے تخلیق کیا ہے۔ ظاہر ہے کہ ملک کی بہادر فوج کو خراج پیش کرنے کے لئے ایک پاکستانی گیت کا راجہ سنگھ نے سہارا لیا ہے۔ ان کی اس حرکت کی سوشل میڈیا پر مذمت کی گئی اور کہا گیا کہ چوکیدار راجہ سنگھ چور ہے۔ اس ضمن میں جب میڈیا نے راجہ سنگھ سے سوال کیا تو انہوں نے جواب دینے سے انکار کردیا، تاہم پاکستانی میڈیا کی جانب سے راجہ سنگھ کا خوب مذاق اڑایا گیا۔