بی جے پی لیڈر کا کارنامہ! محکمہ پولیس کے ساتھ ہیرا پھیری، مقدمہ درج

امیٹھی: یوپی کے امیٹھی میں بی جے پی کے ایک لیڈر نے محکمہ پولیس کے ساتھ بھی ہیرا پھیری کر دی۔ پولیس لائن کی تعمیر کے لیے محکمہ پولیس نے اس سے دو کروڑ روپے کی زمین خریدی تھی۔ یہ زمین 78 لاکھ روپے کے قرض کی وجہ سے بینک کے پاس رہن رکھی گئی تھی لیکن بی جے پی لیڈر نے فرضی دستاویزات کی مدد سے کا بیع نامہ کروا لی۔ جب محکمہ پولیس کو ریکوری کا نوٹس موصول ہوا تو اس کے ہوش اڑ گئے اور فوری طور پر بی جے پی لیڈر کے خلاف ایف آئی آر درج کرائی گئی۔

بی جے پی لیڈر اوم پرکاش مشرا عرف پرکاش مشرا نے امیٹھی پولیس کو تقریباً 78 لاکھ روپے کا چونا لگایا ہے۔ دراصل، پرکاش مشرا نے اپنی زمین رہن رکھ کر 78 لاکھ کا قرض لیا تھا اور پھر اس زمین کو امیٹھی پولیس کو تقریباً دو کروڑ روپے میں بیچ دیا تھا۔ امیٹھی کے ایس پی ایلامارن جی نے پیر کو بتایا کہ بی جے پی لیڈر پرکاش مشرا نے جعلسازی کی ہے اور ان کے خلاف مقدمہ درج کیا گیا ہے۔

ایس پی نے مزید کہا کہ ملزم نے اپنی زمین رہن رکھ کر بینک آف انڈیا سے قرض لیا تھا۔ بعد ازاں جعلی دستاویزات کے ذریعے پولیس لائن بنانے کے لیے زمین پولیس کو فروخت کر دی۔ یہ زمین امیٹھی کے گوری گنج میں صدر تحصیل کے تحت چوہان پور گاؤں میں واقع ہے۔

مشرا نے 27 جولائی 2017 کو 0.253 مربع میٹر زمین کی فروخت کا بیع نامہ کرایا تھا۔ فروخت کے عمل کو انجام دینے کے بعد بی جے پی لیڈر کو امیٹھی پولیس سے 1.97 کروڑ روپے کی ادائیگی موصول ہوئی۔ رجسٹری کے دوران پرکاش نے اس بارے میں کوئی معلومات نہیں دی کہ آیا اس پر کوئی قرض ہے یا نہیں۔

پولیس لائن امیٹھی میں کانسٹیبل انسپکٹر کی طرف سے درج کرائی گئی شکایت کی بنیاد پر مشرا کے خلاف مقدمہ درج کیا گیا ہے۔ امیٹھی بی جے پی کے ضلع صدر درگیش ترپاٹھی نے کہا کہ مشرا پارٹی کارکن ہیں اور ان کے خلاف مقدمہ درج کیا گیا ہے۔ انہوں نے کہا کہ قانون اپنا کام کرے گا اور اگر مشرا قصوروار پائے گئے تو ان کے خلاف کارروائی کی جائے گی۔