ٹریکٹر ریلی میں تشدد کے بعد بی جے پی لیڈر کپل مشرا نے ’ترنگا یاترا‘ نکالنے کا کیا اعلان

یوم جمہوریہ کے موقع پر کسانوں نے پرامن انداز میں ’ٹریکٹر ریلی‘ نکالنے کا اعلان کیا تھا، لیکن جگہ جگہ تشدد اور توڑ پھوڑ کے واقعات سامنے آئے اور لال قلعہ میں گھس کر کچھ لوگوں نے جھنڈا تک لہرانے کا عمل انجام دیا، اس پورے واقعہ کی اب جانچ چل رہی ہے اور کئی ایف آئی آر بھی پولس نے درج کر لی ہیں۔ اس درمیان بی جے پی کے شعلہ بیان لیڈر کپل مشرا نے اعلان کیا ہے کہ وہ 30 جنوری کو ’ترنگا یاترا‘ نکالیں گے۔

دراصل کپل مشرا نے اپنے آفیشیل ٹوئٹر اکاؤنٹ سے ایک پوسٹ کیا ہے جس میں لکھا ہے ’’ترنگے کی بے عزتی اب منظور نہیں، پولس والوں پر حملہ اب برداشت نہیں، ترنگا ہماری عزت، پولس ہمارا وقار۔ ترنگا مارچ- نیشنل فلیگ مارچ 30 جنوری، ہفتہ، شام 5 بجے۔ سنٹرل پارک کناٹ پلیس۔ آپ سبھی ضرور آئیے، ہاتھوں میں ترنگا لے کر۔‘‘ گویا کہ کپل مشرا نے 30 مارچ کو سنٹرل پارک کناٹ پلیس میں ترنگا یاترا نکالنے کا اعلان کر دیا ہے۔ اب دیکھنے والی بات یہ ہوگی کہ ان کے اس ترنگا یاترا کو انتظامیہ کی جانب سے منظوری ملتی ہے یا نہیں۔

اپنے ایک دیگر ٹوئٹ میں کپل مشرا نے لال قلعہ پر جھنڈا لہرائے جانے کے عمل کو دہشت گردانہ حملہ ٹھہرایا ہے۔ انھوں نے ٹوئٹ میں لکھا ہے کہ ’’لال قلعہ پر دہشت گردانہ حملے کو 24 گھنٹے ہو چکے ہیں۔ ملک کو یوگیندر یادو، ٹکیت، راجدیپ، دیپ سدھو کی گرفتاری کا انتظار۔ دہشت گردوں نے اب پارلیمنٹ پر خالصتانی جھنڈا لگانے کا اعلان کر دیا ہے۔‘‘

قابل ذکر ہے کہ لال قلعہ پر جھنڈا لہرانے والے دیپ سدھو کو این آئی اے نے پوچھ تاچھ کے لیے طلب کیا ہے، اور یوم جمہوریہ پر جو کچھ لال قلعہ میں ہوا، اس کی سبھی پارٹیوں نے سخت الفاظ میں مذمت کی ہے۔ کسان لیڈروں نے بھی خود کو اس واقعہ سے الگ کر لیا ہے اور کہا ہے کہ یہ کچھ شرپسند عناصر تھے جنھوں نے ماحول خراب کرنے کے مقصد سے ایسا کیا۔ کسان لیڈروں کا یہ بھی کہنا ہے کہ ان کا منصوبہ لال قلعہ میں داخل ہونے کا نہیں تھا، اور نہ ہی وہاں پہنچ کر جھنڈا لہرانے کا۔

اس پورے واقعہ کے تعلق سے دیپ سدھو کا بیان بھی سامنے آیا ہے۔ اس نے فیس بک پر ایک ویڈیو پوسٹ کیا ہے جس میں کہا ہے کہ ’’یہ کوئی منصوبہ بند قدم نہیں تھا اور اس واقعہ کو کوئی فرقہ وارانہ رنگ نہیں دیا جانا چاہیے جیسا کہ کٹرپنتھیوں کے ذریعہ کیا جا رہا ہے۔‘‘ سدھو نے یہ بھی کہا ہے کہ ’’نئے زرعی قوانین کے خلاف علامتی احتجاج درج کرانے کے لیے ہم نے ’نشان صاحب‘ اور کسان جھنڈا لگایا اور ساتھ ہی کسان مزدور اتحاد کا نعرہ بھی لگایا۔‘‘