’بی جے پی ووٹ خریدنے کے لیے لوگوں کو 5000، 10000 اور 15000 روپے تک دے رہی‘، ممتا بنرجی کا سنگین الزام

مغربی بنگال کی وزیر اعلیٰ اور ترنمول کانگریس چیف ممتا بنرجی نے بدھ کے روز بی جے پی پر سنگین الزام عائد کرتے ہوئے کہا کہ بی جے پی لوگوں کو پیسے دے کر ان کے ووٹ خرید رہی ہے۔ ترنمول کانگریس امیدوار متالی باگ کی حمایت میں آرام باغ میں ایک ریلی سے خطاب کرتے ہوئے ممتا بنرجی نے یہ الزام عائد کیا۔ انھوں نے کہا کہ ’’بی جے پی ووٹ خریدنے کے لیے لوگوں کو 5000 روپے، 10000 روپے اور 15000 روپے تک دے رہی ہے۔‘‘

وزیر اعلیٰ نے بی جے پی میں سماج دشمن عناصر کی موجودگی کا بھی الزام عائد کیا۔ انھوں نے کہا کہ ’’موجودہ وقت کے بی جے پی لیڈران پرانے وقت کے سی پی ایم والے سماج دشمن عناصر جیسے ہی ہیں۔ اگر آپ نہیں چاہتے کہ دہشت کا راج قائم ہو تو بی جے پی کو ووٹ دینے سے بچیں۔‘‘ وہ مزید کہتی ہیں کہ ’’یہ انتخاب دہلی میں اقتدار کی تبدیلی کے لیے ہے۔ مرکز کی موجودہ حکومت کو بدل کر تبدیلی لانی ہوگی۔‘‘

ترنمول چیف کا کہنا ہے کہ بی جے پی کی مغربی بنگال کے لوگوں کو بدنام کرنے کی عادت ہے اور وہ ہمیشہ ایسا ہی کرتی ہے۔ انھوں نے کہا کہ ’’دیکھیے، انھوں نے سک طرح سندیش خالی کی خواتین کو عصمت دری کے جھوٹے الزام لگانے کے لیے پیسے دے کر ان کی بے عزتی کی۔‘‘

ممتا بنرجی نے اس دوران بی جے پی پر مغربی بنگال میں 26 ہزار اساتذہ کی ملازمت چھیننے کا الزام بھی عائد کیا۔ انھوں نے کہا کہ ’’سچ سامنے آ گیا ہے۔ سپریم کورٹ کے کل دیے گئے فیصلے کے بعد میں حقیقی معنوں میں مطمئن محسوس کر رہی ہوں کہ کچھ وقت کے لیے ملازمتیں بچ گئیں۔‘‘ پی ایم مودی پر حملہ کرتے ہوئے انھوں نے کہا کہ وہ صبح سے شام تک جھوٹ بولتے رہتے ہیں۔ ممتا نے کہا کہ ’’مودی کہتے ہیں ہماری پارٹی نے 100 دن کے کام کا پیسہ ہضم کر لیا۔ جبکہ 100 دن کے کام کے تحت ریاستی حکومت نے 24 کروڑ روپے بچائے۔‘‘ وہ مزید کہتی ہیں کہ ’’اگر اس مرتبہ مودی جیت جاتے ہیں تو سب کچھ ختم ہو جائے گا۔ مستقبل میں کوئی انتخاب بھی نہیں ہوگا۔‘‘ ساتھ ہی انھوں نے یہ بھی کہا کہ ’’بی جے پی شہریت (ترمیمی) قانون اور این آر سی کا استعمال کر کے لوگوں کو باہر نکال دے گی۔ اگر مودی پھر سے برسراقتدار ہوتے ہیں تو اقلیتوں، قبائلیوں اور دیگر پسماندہ طبقات کے سامنے وجود کا بحران کھڑا ہو جائے گا۔‘‘