بی جے پی نے پولیس کو اتنے اختیارات دے دئے کہ تھانے لاقانونیت کا اڈہ بن چکے ہیں: اکھلیش یادو

جھانسی: سماج وادی پارٹی (ایس پی) سربراہ اکھلیش یادو نے بھارتیہ جنتا پارٹی (بی جے پی) کی ریاستی حکومت کی سخت تنقید کرتے ہوئے جمعرات کو کہا کہ اس پارٹی کے میعاد کار میں پولیس کا اتنا غلط استعمال کیا گیا اور اسے اتنے اختیارات دئیے گئے کہ آج تھانے بے لگام ہیں اور لاقانونیت کا اڈہ بن چکے ہیں۔

للت پور عصمت دری متاثرہ اور اس کے اہل خانہ سے ملاقات کر کے جھانسی پہنچے ایس پی صدر نے یہاں میڈیا نمائندوں سے کہا کہ'جب پولیس سے غلط کام لوگے تو پھر پولیس کے غلط کام یا اس کی من مانی کیسے روکے گے۔ اس لئے تھانے لاقانونیت کے اڈے بن گئے ہیں۔ للت پور کا واقعہ کوئی پہلا واقعہ نہیں ہے۔ لگاتار پولیس کے آمرانہ رویہ کے معاملے سامنے آ رہے ہیں۔آخرپولیس کو اتنے اختیارات کس نے دئیے؟ اسی کا نتیجہ ہے کہ محافظ پولیس خود اب خطرہ بن گئی ہے۔اور جب ایسا ہو تو سوچئے کہ ہم کس سمت میں جارہے ہیں۔

انہوں نے سوال کیا کہ'ایسے لوگوں کو حکومت کب معطل برخواست کرے گی۔ للت پور تھانے کا واقعہ ٹھنڈا بھی نہیں ہوا کہ ایک اور خاتون کے ساتھ بدسلوکی کامعاملہ سامنے آگیا ہے۔جرائم کے معاملوں میں سب سے زیادہ نوٹس یوپی کومل رہے ہیں۔ وہ تو سماج وادیوں کے نکل پڑنے سے دباؤ بن گیا اور انہیں پولیس کے خلاف کاروائی کرنی پڑی۔

ایس پی سربراہ نے کہا کہ گورکھپور کاروباری کی موت کو ہی دیکھ لیجئے۔ چاہے دو بہنوں کو پیٹنے کا معاملہ لے لیجئے۔ آخر اترپردیش کی پولیس کو اختیارات کس نے دئیے؟چاہے جہاں بلڈوزر چلا دیتے ہیں۔ بی جے پی کے لوگ کچھ بھی کریں تو کچھ نہیں اور ایک ذات کا نام آئے تو بلڈوزر نکل پڑتے ہیں۔ انہوں نے یہ بھی الزام لگایا کہ آج کل نیوز چینل وزیر اعظم مودی کے اشارے پر چل رہے ہیں۔