کیجریوال حکومت میں وزیر راجندر گوتم کے ذریعہ دیوی-دیوتاؤں کی بے حرمتی سے بی جے پی ناراض، پولیس میں شکایت درج

دہلی بی جے پی صدر آدیش گپتا نے کیجریوال حکومت میں وزیر راجندر گوتم کے خلاف پارلیمنٹ اسٹریٹ تھانہ میں جا کر شکایت درج کرائی ہے۔ ایک وفد کے ساتھ تھانہ پہنچے آدیش گپتا نے اپنی شکایت میں کہا ہے کہ راجندر گوتم نے دیوی-دیوتاؤں کی بے حرمتی کی ہے جس سے ہندوؤں کے عقیدے کو ٹھیس پہنچی ہے۔ اس لیے ان کے خلاف سخت کارروائی کی جانی چاہیے۔

دراصل دہلی کابینہ میں وزیر راجندر پال گوتم نے گزشتہ 5 اکتوبر کو تقریباً 10 ہزار کے مجمع میں کھڑے ہو کر بھگوان رام اور کرشن کو نہ ماننے، اور کبھی بھی ان کی پوجا نہ کرنے کا حلف لیا تھا۔ اس پروگرام کی ویڈیو جب سامنے آئی تو ہنگامہ برپا ہو گیا۔ بی جے پی نے اس ویڈیو پر عآپ کو تنقید کا نشانہ بنانا شروع کر دیا۔ ویڈیو ’مشن جئے بھیم‘ پروگرام کی بتائی جا رہی ہے جس میں راجندر پال گوتم بھی شامل ہوئے تھے۔ دہلی کے قرول باغ واقع امبیڈکر بھون میں منعقد اس تقریب میں تقریباً 10 ہزار لوگوں نے بودھ مذہب اختیار کیا۔ بتایا جاتا ہے کہ اس پروگرام میں راجندر گوتم نے لوگوں کو رام اور کرشن کی پوجا نہ کرنے کا حلف دلایا تھا۔

ویڈیو سامنے آنے کے بعد بی جے پی رکن پارلیمنٹ منوج تیواری نے ایک پریس کانفرنس کر کے عآپ حکومت پر شدید حملہ کیا۔ انھوں نے پریس کانفرنس میں سوال اٹھایا کہ عآپ آخر اس قدر ہندو مخالف کیوں ہے؟ تیواری نے کہا کہ یہ ہندو اور بودھ مذہب کی بے عزتی ہے۔ عآپ کے وزیر فساد پیدا کرنے کی کوشش کر رہے ہیں، اس لیے راجندر گوتم کو فوراً پارٹی سے نکال باہر کرنا چاہیے۔

دہلی بی جے پی صدر آدیش گپتا کا اس تعلق سے کہنا ہے کہ راجندر گوتم کو دیوی-دیوتاؤں کی بے حرمتی کرنے پر سزا ملنی چاہیے۔ انھوں نے کہا کہ ’’نفرت پھیلانا اور ہندو مذہب کی بے عزتی کرنا عآپ کی تاریخ رہی ہے۔‘‘ آدیش گپتا نے ایک ٹوئٹ بھی کیا ہے جس میں لکھا ہے ’’ایک بار پھر عآپ کا ہندو مخالف چہرہ بے نقاب۔ اروند کیجریوال کے وزیر لوگوں سے حلف دلوا رہے ہیں کہ میں کسی برہمن، وشنو، مہیش کو نہیں مانوں گا۔ تو پھر انتخاب کے دوران مندروں میں کیا دکھانے کے لیے جاتے ہو؟ کیا ہندو مذہب اتنا چبھتا ہے عآپ کی آنکھوں میں؟ اتنی نفرت کیوں؟‘‘

اس پورے معاملے پر راجندر پال گوتم کا بیان بھی سامنے آیا ہے۔ انھوں نے اپنے عمل پر وضاحت پیش کرتے ہوئے کہا ہے کہ جو کچھ حلف لیا گیا ہے اس میں کوئی برائی نہیں ہے۔ انھوں نے کہا کہ ’’بی جے پی غدارِ وطن ہے۔ میرا عقیدہ بودھ مذہب میں ہے، اس سے کسی کو پریشانی کیوں ہے؟‘‘ راجندر پال گوتم نے مزید کہا کہ ’’انھیں (بی جے پی) شکایت کرنے دو۔ آئین ہمیں کسی بھی مذہب کو ماننے کی اجازت دیتا ہے۔ بی جے پی عآپ سے خوفزدہ ہے۔ وہ صرف ہمارے خلاف فرضی معاملے درج کر سکتے ہیں۔