بیجو جنتا دل نے راجیہ سبھا کے رکن سوجیت کمار کو پارٹی سے کیا باہر، بی جے پی میں شامل

نئی دہلی: بیجو جنتا دل (بی جے ڈی) نے ایک اہم فیصلہ لیتے ہوئے جمعہ کو پارٹی کے راجیہ سبھا کے رکن پارلیمنٹ سوجیت کمار کو فوری اثر سے پارٹی سے برخاست کر دیا۔ بی جے ڈی کا کہنا ہے کہ سوجیت پارٹی مخالف سرگرمیوں میں ملوث تھے، جس کی وجہ سے انہیں برخاست کیا گیا۔ دریں اثنا، انہوں نے بی جے پی میں شمولیت اختیار کر لی۔

بی جے ڈی کے صدر اور سابق وزیر اعلی نوین پٹنائک کی طرف سے جاری کردہ ایک بیان میں کہا گیا ہے کہ بیجو جنتا دل کے راجیہ سبھا رکن پارلیمنٹ سوجیت کمار کو پارٹی مخالف سرگرمیوں کی وجہ سے فوری اثر سے پارٹی سے نکال دیا گیا ہے۔ انہوں نے اس پارٹی کو مایوس کیا ہے جس نے انہیں راجیہ سبھا میں بھیجا ہے اور ضلع کالاہندی کے لوگوں کی امیدوں اور امنگوں کو ٹھیس پہنچائی ہے۔

پارٹی سے نکالے جانے کے فوری بعد سوجیت کمار نے بی جے پی میں شمولیت اختیار کر لی۔ بی جے پی میں شامل ہونے کے بعد سوجیت کمار نے کہا، ’’وزیر اعظم نریندر مودی ہمیشہ خود انحصار ہندوستان کی بات کرتے ہیں۔ وہ مشرقی ہندوستان کی ترقی کو یقینی بنانے کے لیے ہمیشہ سرگرم رہے ہیں۔ اب تک یہ علاقہ ملک کی دیگر ریاستوں کے مقابلے میں تھوڑا پسماندہ تھا۔ اوڈیشہ سے ان کا خاص لگاؤ ​​ہے۔ اوڈیشہ 2036 میں اپنے قیام کے 100 سال مکمل کرے گا۔ انہوں نے ہمیشہ ریاست کو ترقی یافتہ بنانے کے لیے رہنمائی کی۔‘‘

قبل ازیں، سوجیت کمار نے راجیہ سبھا کی رکنیت سے استعفیٰ دے دیا۔ راجیہ سبھا کے چیئرمین کے نام اپنے استعفیٰ نامہ میں سوجیت کمار نے لکھا، ’’میں راجیہ سبھا کی رکنیت سے استعفیٰ دے رہا ہوں۔ میں نے یہ فیصلہ بہت غور و فکر کے بعد کیا ہے۔‘‘ ان کا استعفیٰ منظور بھی کر لیا گیا ہے۔

نائب صدر جمہوریہ ہند کے دفتر کے سوشل میڈیا پلیٹ فارم 'ایکس' پر جاری کردہ ایک بیان میں لکھا گیا ہے کہ ہندوستان کے نائب صدر اور راجیہ سبھا کے چیئرمین جگدیپ دھنکھڑ نے آئین کے آرٹیکل 101 3 (بی) کے مطابق، راجیہ سبھا سے سوجیت کمار کا استعفیٰ فوری طور پر قبول کر لیا گیا ہے۔

خیال رہے کہ سوجیت کمار 2020 سے راجیہ سبھا کے رکن تھے۔ اس کے علاوہ وہ اس وقت راجیہ سبھا کی پٹیشن کمیٹی کے چیئرمین بھی ہیں۔ انہیں حکومت اوڈیشہ میں مختلف اہم عہدوں پر فائز رہنے کا تجربہ ہے، جس میں چیف سکریٹری، اسپیشل ڈیولپمنٹ کونسل (ایس ڈی سی) کے مشیر اور اوڈیشہ اسٹیٹ پلاننگ بورڈ کے اسپیشل سکریٹری کے طور پر کام کرنا بھی شامل ہے۔ ان کی قابلیت اور تجربے کو دیکھتے ہوئے بی جے ڈی نے انہیں راجیہ سبھا بھیج دیا تھا۔