بہار: کانگریسیوں پر لاٹھی چارج کے خلاف اسمبلی میں ہنگامہ، تیجسوی نے بھی اٹھائی آواز

بہار اسمبلی کے سرمائی اجلاس کے دوسرے دن پیر کو اپوزیشن پارٹیوں نے اتوار کو کانگریس لیڈروں کے پرامن مظاہرہ پر ہوئے پولس لاٹھی چارج کو لے کر خوب ہنگامہ کیا۔ اس درمیان اپوزیشن کے لیڈر تیجسوی یادو نے اس واقعہ کی مذمت کرتے ہوئے کہا کہ حکومت تاناشاہی پر اتر گئی ہے اور وہ لاٹھی سے عوام کی آواز دبانا چاہتی ہے۔ بہار اسمبلی کے سرمائی اجلاس کے دوسرے دن اپوزیشن پارٹیوں کے اراکین نے ایوان کے باہر اور اندر جم کر ہنگامہ کیا۔ ایوان کی کارروائی شروع ہوتے ہی اپوزیشن لیڈران ویل میں آ کر ہنگامہ کرنے لگے۔ اس دوران اپوزیشن کے لیڈر نے پٹنہ میں کانگریس لیڈروں پر لاٹھی چارج کی مذمت کرتے ہوئے اپنی بات رکھنے کی کوشش کی، لیکن انھیں ضابطوں کے مطابق اپنی باتیں رکھنے کو کہا گیا۔

اس درمیان اسمبلی اسپیکر وجے کمار چودھری نے کئی بار اپوزیشن اراکین کو اپنی جگہ پر جانے کے لیے کہا، لیکن ہنگامہ جاری رہا جس کی وجہ سے ایوان کی کارروائی دوپہر دو بجے تک کے لیے ملتوی کر دی گئی۔ اس سے پہلے ایوان کے باہر پورتیکو میں سی پی آئی-ایم ایل کے اراکین نے این آر سی کے خلاف بل لانے کا مطالبہ کرتے ہوئے ہنگامہ کیا۔ بہار میں بڑھتی آلودگی پر حکومت کے ذریعہ کوئی قدم نہیں اٹھانے کے خلاف کانگریس کے پریم چندر مشرا سمیت کئی رکن ماسک لگا کر ایوان پہنچے۔ مشرا نے کہا کہ آلودگی پر کنٹرول پانے کے لیے حکومت کچھ نہیں کر پا رہی ہے۔

اس کے بعد ایوان کے باہر صحافیوں سے بات چیت کرتے ہوئے تیجسوی نے بہار کی حکومت کو تاناشاہ بتاتے ہوئے انھیں زبردست طریقے سے تنقید کا نشانہ بنایا۔ انھوں نے بے روزگاری کے ایشو پر بھی حکومت کو آڑے ہاتھوں لیتے ہوئے کہا کہ بہار میں بے روزگاری بڑھ رہی ہے۔

تیجسوی یادو نے مہاراشٹر کے معاملے کو بھی ایوان میں اٹھایا۔ انھوں نے کہا کہ معاملہ میں جو کچھ ہوا وہ مینڈیٹ کی بے عزتی ہے۔ بہار میں بھی ایسا ہو چکا ہے۔ اپوزیشن لیڈر نے پٹنہ میں کانگریسی لیڈروں اور کارکنوں پر لاٹھی چارج کیے جانے کی مذمت کرتے ہوئے کہا کہ حکومت کے خلاف آواز اٹھانے والوں کو لاٹھی-ڈنڈے سے دبانے کی کوشش ہو رہی ہے۔

واضح رہے کہ اتوار کو مہنگائی، بے روزگاری کے خلاف کانگریس کے ذریعہ ’جن ویدنا مارچ‘ نکالا گیا تھا، جس پر پولس نے لاٹھی چارج کیا تھا۔