بہار اسمبلی انتخاب: پہلے مرحلہ میں 71 سیٹوں پر ووٹنگ آج، 1066 امیدواروں کی قسمت کا ہوگا فیصلہ

بہار اسمبلی انتخاب کے پیش نظر پہلے مرحلہ میں 71 سیٹوں پر ووٹنگ کی سبھی تیاریاں مکمل کر لی گئی ہیں۔ آج یعنی بدھ کو جن 71 اسمبلی سیٹوں پر ووٹ ڈالے جانے ہیں، ان پر انتخابی تشہیر کا شور پیر کے روز ہی ختم ہو گیا تھا، اور اب سبھی امیدوار یہ دعاء کر رہے ہیں کہ ووٹرس ان کے حق میں ووٹ ڈالیں۔ منگل کے روز امیدواروں کا اپنے حامیوں کے ساتھ ملاقات کا سلسلہ خوب دیکھنے کو ملا جو کہ پہلے مرحلہ کی ووٹنگ سے متعلق پالیسی تیار کرنے میں لگے ہوئے تھے۔ کئی علاقوں میں تو سیاسی پارٹیوں کے کارکنان ووٹروں سے ملاقات کرتے ہوئے بھی نظر آئے تاکہ ان کے حق میں زیادہ سے زیادہ ووٹ پڑے۔

بدھ کے روز پہلے مرحلہ کی ووٹنگ کے تحت ریاست کی 243 اسمبلی سیٹوں میں سے 71 سیٹوں پر ووٹنگ ہونی ہے۔ پہلے مرحلہ میں 1066 امیدواروں کی قسمت کا فیصلہ ہوگا۔ پہلے مرحلہ میں 2 کروڑ 14 لاکھ سے زیادہ ووٹرس اپنے حق رائے دہی کا استعمال کریں گے۔ اس مرحلہ کے لیے 31 ہزار 371 پولنگ مراکز بنائے گئے ہیں۔

پہلے مرحلہ میں آر جے ڈی کے 42، جنتا دل یو کے 35، بی جے پی کے 29 اور کانگریس کے 21 امیدوار اپنی قسمت آزمائی کر رہے ہیں۔ ان کے علاوہ سی پی آئی (ایم ایل) کے 8، ہندوستانی عوامی مورچہ کے 6 اور وی آئی پی کا ایک امیدوار انتخابی میدان میں ہے۔ پہلے مرحلہ میں ایل جے پی نے بھی 42 سیٹوں پر اپنے امیدواروں کو کھڑا کیا ہے۔ پہلے مرحلہ کے انتخاب میں سابق وزیر اعلیٰ جیتن رام مانجھی کے علاوہ نتیش حکومت کے 8 وزیر یعنی پریم کمار، کرشن نندن ورما، شیلیش کمار، وجے کمار سنہا، جے کمار سنگھ، رام نارائن منڈل، سنتوش کمار نرالا اور برج کشور بند سمیت کئی سرکردہ لیڈر انتخابی میدان میں ہیں۔

قابل ذکر ہے کہ پہلے مرحلہ میں گیا اسمبلی سیٹ سے قسمت آزما رہے بہار حکومت کے وزیر پریم کمار کے حامی منگل کو پولنگ سنٹر سطح تک کارکنان سے رپورٹ لیتے ہوئے نظر آئے اور فون پر بھی لوگوں سے رابطہ میں رہے۔ ارول میں بی جے پی امیدوار دیپک شرما کے حامی بھی لوگوں کے درمیان پہنچے۔ دیپک شرما کہتے ہیں کہ "بوتھ سطح تک این ڈی اے کے کارکنان تیاری دیکھ رہے ہیں۔" انھوں نے ارول سے جیت کا دعویٰ کرتے ہوئے کہا کہ ان کے ساتھ سبھی ذات اور طبقہ کے لوگ ہیں۔

دوسری طرف بھاگلپور کے سلطان گنج سیٹ سے کانگریس امیدوار اور یوتھ کانگریس کے سابق ریاستی صدر للن کمار بھی منگل کے روز اپنے گھر سے نکلے اور آس پاس کے لوگوں سے ملاقات کرتے ہوئے نظر آئے۔ اس دوران کئی نوجوان کارکنان بھی ان سے ملنے پہنچے۔ اسی طرح امر پور کے ایل جے پی امیدوار شیکھر بھی آخری دور میں ووٹروں سے جڑنے کی کوشش کرتے ہوئے دیکھے گئے۔ شیکھر کے حامی ووٹروں تک پہنچ کر حمایت کا مطالبہ کر رہے تھے۔