ریل مسافروں کو بڑی راحت، 'نان انٹرلاکنگ' کام ملتوی ہونے کے بعد 74 ٹرینوں کی منسوخی کا فیصلہ واپس

پَلول ریلوے اسٹیشن کو نیو پرتھلا ڈیڈیکیٹڈ فریٹ کوریڈور اسٹیشن کے یارڈ سے جوڑنے کے لیے پلول اسٹیشن پر نان انٹرلاکنگ کام کو فی الحال ملتوی کر دیا گیا ہے۔ اس فیصلہ کے بعد ریل مسافروں نے راحت کی سانس لی ہے کیونکہ گزشتہ دنوں ریل انتظامیہ نے پلول اسٹیشن پر نان انٹرلاکنگ کا کام کرنے کی وجہ سے ٹریفک بلاک کا اعلان کیا تھا۔

ٹریفک بلاک کی وجہ سے پلول سے ہوکر چلنے والی حضرت نظام الدین-رانی کملاپتی وندے بھارت اکسپریس، گتیمان اکسپریس سمیت 74 ٹرینیں ستمبر میں کئی دنوں کے لیے منسوخ کردی گئی تھیں۔ لیکن نان انٹرلاکنگ کا کام ملتوی ہونے کی وجہ سے ان ٹرینوں کی منسوخی کو واپس لے لیا گیا ہے اور اب یہ سبھی ٹرینیں پہلے کے طے شدہ وقت کے مطابق چلیں گی۔

شمالی ریلوے دہلی ڈویژن کے چیف پبلک ریلیشن آفیسر ہمانشو شیکھر نے اس سلسلے میں جانکاری دی کہ پلول میں ہونے والے نان انٹرلاکنگ کام کو اگلے فیصلہ تک ملتوی کر دیا گیا ہے۔ ایسے میں جن ٹرینوں کو پہلے منسوخ کیا گیا یا جن کی آمد و رفت متاثر کی گئی تھی، وہ اب باضابطہ چلیں گی۔ انبالہ-دہلی روٹ کی اَپ-ڈاؤن لائن پر پر منسوخ کی گئی دادر اکسپریس، گیتا جینتی، ہوشیار پور، اکسپریس و گوا سمپرک کرانتی کو طے وقت کے مطابق چلایا جائے گا۔ ساتھ ہی سچ کھنڈ اکسپرس و جھیلم اکسپریس کے وقت میں بھی کوئی تبدیلی نہیں ہوگی۔ ٹرینوں کے باضابطہ چلنے سے مسافروں کو ہونے والی پریشانی سے راحت مل گئی ہے۔