گجرات میں منشیات کے بڑے ریکیٹ کا پردہ فاش، پانچ ہزار کروڑ روپے کی کوکین برآمد

گجرات میں منشیات کے ایک اور بڑے ریکیٹ کا پردہ فاش ہوا ہے۔ پولیس نے 500 کلو کوکین برآمد کی ہے جس کی قیمت پانچ ہزار کروڑ روپے بتائی جاتی ہے۔ واضح رہے کہ دہلی پولیس اور گجرات پولیس نے ایک مشترکہ آپریشن میں پانچ ہزار کروڑ روپے کی کوکین برآمد کی ہے۔ یہ 518 کلو گرام کوکین گجرات کے انکیشور میں اوکار ڈرگس لمیٹڈ کمپنی سے پکڑی گئی ہے۔

دہلی پولیس کے اسپیشل سیل نے حال ہی میں دہلی سے 700 کلو سے زیادہ کوکین برآمد کی تھی۔ تفتیش کے دوران یہ بات سامنے آئی کہ برآمد شدہ ڈرگس فارما سلوشن سروسز نامی کمپنی کی ہیں اور یہ اوکار ڈرگس لمیٹڈ کمپنی سے آئی تھیں۔ اس معاملے میں اب تک کل 1289 کلو گرام کوکین اور 40 کلو ہائیڈروپونک تھائی چرس برآمد کی گئی ہے، جس کی کل مالیت 13000 کروڑ روپے ہے۔

نیوز پورٹل ’آج تک‘ پر شائع خبر میں تحریر ہے کہ دہلی پولیس کے ایک اہلکار کے مطابق، 700 کلو گرام کوکین کی پچھلی ضبطی کی تحقیقات کے دوران، اسپیشل سیل کو پتہ چلا کہ یہ منشیات انکلیشور میں اوکار ڈرگس کمپنی سے لائی گئی تھیں۔ اہلکار نے بتایا کہ اتوار کو اسپیشل سیل کی ایک ٹیم گجرات بھیجی گئی اور کمپنی کے گودام سے کوکین برآمد کی گئی، اور موقع سے پانچ افراد کو گرفتار بھی کیا گیا۔

پولیس کا کہنا تھا کہ ملزمان سے دبئی اور برطانیہ سے چلنے والے بین الاقوامی سنڈیکیٹ کے حوالے سے مزید پوچھ گچھ کی جا رہی ہے۔ واضح رہے کہ 2 اکتوبر کو، اسپیشل سیل نے جنوبی دہلی کے مہیپال پور میں ایک گودام سے 560 کلو گرام سے زیادہ کوکین اور 40 کلو گرام ہائیڈروپونک چرس ضبط کی تھی، جس کی قیمت 5,620 کروڑ روپے بتائی گئی تھی۔ اس معاملے میں چار لوگوں کو گرفتار کیا گیا تھا جبکہ دو دیگر کو بعد میں امرتسر اور چنئی سے پکڑا گیا تھا۔

اس کے علاوہ، ایک ہفتے میں منشیات کی دوسری بڑی کھیپ میں، اسپیشل سیل نے جمعرات کو مغربی دہلی میں کرائے کی ایک دکان سے 208 کلو گرام کوکین ضبط کی جس کی مالیت 2,080 کروڑ روپے ہے۔ جمعرات کو پولس نے اتر پردیش کے ہاپوڑ سے ایک اور شخص کو گرفتار کیا۔ وہ اس معاملے میں گرفتار ہونے والا ساتوا شخص تھا۔