یوگی حکومت کا غیر منطقی فیصلہ، نہیں پڑھائی جائے گی مغلوں کی تاریخ

اتر پردیش کی یوگی حکومت نے تعلیمی سیشن 24-2023 کے لیے یوپی بورڈ اور سی بی ایس ای بورڈ کے نصاب میں بڑی تبدیلیاں کی ہیں۔ اسکولوں میں اب طلباء کو مغلوں کی تاریخ نہیں پڑھائی جائے گی۔ یوپی حکومت نے تاریخ کی کتاب 'ہندوستانی تاریخ کے کچھ عنوانات' سے مغل دربار کے باب کو ہٹا دیا ہے۔ اس کے علاوہ گیارہویں کی کتاب سے رائز آف اسلام، کلیش آف کلچرز، انڈسٹریل ریوولیشن، بگننگ آف ٹائم کے اسباق کو ہٹا دیا گیا ہے۔

اس کے ساتھ ہی سیوکس کی کتاب سے امریکی بالادستی اور سرد جنگ کا سبق بھی ہٹا دیا گیا ہے۔ یہ فیصلہ تعلیمی سیشن 24-2023 سے لاگو کیا جا رہا ہے۔ اس اقدام پر یوپی کے نائب وزیر اعلیٰ برجیش پاٹھک نے کہا، 'ہماری تہذیب ہماری ثقافتی ورثہ ہے۔ ہم اپنی نئی نسل کو ورثے سے متعارف کرانا چاہتے ہیں۔ پرانے زمانے میں لوگوں کو ہماری ثقافت سے محروم کیا جا رہا تھا اور نئی نسل کو بتایا نہیں جا رہا تھا۔ ہم لوگوں کو حقیقی ثقافت کے بارے میں بتائیں گے۔

ان مضامین کے تحت جنہیں اب کلاس 12 کی تاریخ کی کتابوں سے خارج کر دیا گیا ہے، طلباء کو 'اکبرنامہ' (اکبر کے دور کی سرکاری تاریخ) اور 'بادشاہنامہ' (مغل بادشاہ شاہ جہاں کی تاریخ) سے متعارف کرایا جاتا ہے۔ اس کے علاوہ سیوکس کی کتاب میں بھی تبدیلیاں کی گئی ہیں۔ آزاد ہندوستان میں سیاست کی کتاب سے عوامی تحریکوں کے عروج اور ایک پارٹی کے غلبہ کے دور کا باب بھی بدل دیا گیا ہے۔

نیوز پورٹل ’آج تک‘ پر شائع خبر کے مطابق یوگی حکومت مغلوں کے نام اور تاریخ کو لے کر پہلے بھی کئی فیصلے کر چکی ہے۔ 2020 میں یوگی حکومت نے آگرہ میں مغل میوزیم کا نام بدل کر چھترپتی شیواجی مہاراج میوزیم کر دیا تھا۔ تب یوگی نے ٹوئٹ کر کے کہا تھا، 'آگرہ میں زیر تعمیر میوزیم کو چھترپتی شیواجی مہاراج کے نام سے جانا جائے گا، آپ کے نئے اتر پردیش میں غلامانہ ذہنیت کی علامتوں کے لیے کوئی جگہ نہیں ہے۔ ہمارا ہیرو شیواجی مہاراج ہے۔