بی جے پی کو بڑا جھٹکا، ممبر پارلیمنٹ ارجن سنگھ ترنمول کانگریس میں شامل

مغربی بنگال میں بی جے پی کو بڑا جھٹکا لگا ہے۔ پارٹی کے بیرک پور سے لوک سبھا ایم پی ارجن سنگھ نے آج ٹی ایم سی میں شمولیت اختیار کر لی۔ انہیں ٹی ایم سی جنرل سکریٹری ابھیشیک بنرجی نے پارٹی کی رکنیت دلائی۔ ارجن سنگھ نے ٹی ایم سی میں شامل ہونے کے بعد اپنے سوشل میڈیا اکاؤنٹ کو بھی اپ ڈیٹ کیا ہے۔

بی جے پی کے رکن پارلیمنٹ ارجن سنگھ کو ترنمول کانگریس کے قومی جنرل سکریٹری ابھیشیک بنرجی نے پارٹی کی رکنیت دلائی ہے۔ ارجن سنگھ کو پارٹی میں شامل کرنے کے بعد ٹی ایم سی نے ایک ٹوئٹ کیا تھا۔ ٹوئٹ میں کہا گیا ہے کہ ارجن سنگھ، بنگال بی جے پی کے سابق نائب صدر اور بیرک پور سے ممبر پارلمنٹ کا ٹی ایم سی خاندان میں گرمجوشی سے خیرمقدم کیا جاتا ہے۔

پچھلے کچھ دنوں سے مغربی بنگال میں یہ بحث چل رہی تھی کہ بی جے پی ایم پی ارجن سنگھ ٹی ایم سی میں شامل ہو سکتے ہیں۔ آج صبح سے ہی بنگال کے سیاسی حلقوں میں یہ بحث چل رہی تھی کہ ارجن سنگھ ٹی ایم سی کے جنرل سکریٹری ابھیشیک بنرجی سے ملاقات کر سکتے ہیں۔ شام 4 بجے کے قریب دونوں رہنماؤں کی ملاقات بھی ہوئی جس میں سب کچھ واضح ہو گیا۔ دراصل ارجن سنگھ کچھ عرصے سے بی جے پی کے خلاف بیان دے کر پارٹی سے ناراضگی کے اشارے دے رہے تھے۔