بھوپیش بگھیل نے پٹرول- ڈیزل کی باقاعدہ سپلائی کے لیے ہردیپ پوری کو لکھا خط

رائے پور: چھتیس گڑھ کے وزیر اعلی بھوپیش بگھیل نے مرکزی وزیر پٹرولیم ہردیپ سنگھ پوری کو ایک خط لکھ کر ریاست کے کسانوں اور شہریوں کو پٹرول اور ڈیزل کی قلت سے درپیش مسائل سے آگاہ کراتے ہوئے تمام پٹرولیم کمپنیوں کے ڈپو میں پٹرول ڈیزل کی باقاعدہ فراہمی کی درخواست کی۔

بھوپیش بگھیل نے آج مرکزی وزیر کو لکھے ایک خط میں کہا ہے کہ پچھلے ایک دو ماہ سے ریاست میں پٹرول اور ڈیزل کی سپلائی کم ہو گئی ہے جس کی وجہ سے کئی اضلاع میں پٹرول پمپ خشک ہو رہے ہیں۔ چھتیس گڑھ پٹرولیم ڈیلرز ویلفیئر ایسوسی ایشن کی طرف سے بھی آگاہ کرایا گیا ہے کہ ہندوستان پٹرولیم کارپوریشن کے چھتیس گڑھ میں 750 ریٹیل آؤٹ لیٹس ہیں جن میں پیٹرول، ڈیزل کی باقاعدہ سپلائی نہ ہونے کی وجہ سے کئی دن بند جیسے حالات رہتے ہیں۔ پٹرولیم کمپنیوں کے جائزے میں معلوم ہوا ہے کہ ماضی میں بفر اسٹاک چار پانچ دن کے لئے رہتا ہے، گزشتہ ایک -دوماہ سے بفراسٹاک صرف ایک دن کے لئے بچ رہا ہے، جو کہ کئی بار ختم ہو جا رہا ہے اور ڈپو بھی خشک ہو جاتا ہے۔

انہوں نے وزیرموصوف کو بتایا کہ چھتیس گڑھ ایک زرعی ریاست ہے، مانسون کی آمد کے باعث زرعی کام جاری ہے، ڈیزل کی عدم دستیابی کی وجہ سے کسانوں کو زراعت میں مشکلات کا سامنا ہے۔ اس کے ساتھ ہی دیہی علاقوں میں ڈیزل کی عدم دستیابی کی وجہ سے انتہائی ضروری خدمات، ایمبولینس ٹرانسپورٹ اور عام لوگوں کو مشکلات کا سامنا ہے۔ ڈیزل اور پیٹرول باقاعدگی سے نہ ملنے سے زرعی کام پیچھے رہ جائیں گے جس سے عام لوگوں کو مالی نقصان اٹھانا پڑے گا۔ دیہی علاقوں کے ریٹیل آؤٹ لیٹس کو پیشگی ادائیگی کے بعد بھی ڈیزل پٹرول فراہم نہیں کیا جا رہا ہے۔

بھوپیش بگھیل نے مرکزی وزیر ہردیپ پوری پر زور دیا ہے کہ وہ ہندوستان پٹرولیم کارپوریشن، بھارت پٹرولیم اور انڈین آئل کارپوریشن کے چھتیس گڑھ میں واقع ڈپو میں پٹرول اور ڈیزل کی باقاعدگی سے سپلائی کو یقینی بنانے کی زحمت کریں تاکہ کسانوں اور عام لوگوں کو مشکلات کا سامنا نہ کرنا پڑے۔