بھارت جوڑو یاترا سے کانگریس کی زمین ہو رہی ہے مضبوط، بی جے پی کا ہوگا صفایا: اکھلیش سنگھ

بھاگلپور: بہار کانگریس کے صدر ڈاکٹر اکھلیش پرساد سنگھ نے 'بھارت جوڑو یاترا' کے ذریعے پارٹی کی بنیاد مضبوط کرنے کا دعویٰ کرتے ہوئے آج کہا کہ سال 2024 کے لوک سبھا انتخابات میں بھارتیہ جنتا پارٹی (بی جے پی) کا مکمل صفایا ہو جائے گا۔

اکھلیش سنگھ نے اتوار کو یہاں ایک پریس کانفرنس میں کہا کہ اس یاترا کے ذریعے کانگریس کی بنیاد مضبوط ہو رہی ہے اور سال 2024 میں بی جے پی کا مکمل صفایا ہو جائے گا۔ اتحاد میں نشستوں کے معاملے میں انہوں نے کہا کہ اس کا فیصلہ ہائی کمان کرتی ہے لیکن جو پارٹی جہاں مضبوط ہوگی اسے وہ سیٹ ملے گی۔ جہاں تک دوسری پارٹیوں کو مدعو کرنے کا سوال ہے، یہ کانگریس پارٹی کا اپنا پروگرام ہے، لیکن ہم خیال لوگ جو آنا چاہتے ہیں، ان کا استقبال ہے۔ انہوں نے کہا، ''ہم یہ یاترا نفرت کے خلاف کر رہے ہیں۔ ہمارا نعرہ ہے نفرت چھوڑو: بھارت جوڑو۔

ریاستی صدر نے کہا کہ آج ہم پچاس کلومیٹر سے زیادہ کا سفر طے کر کے بھاگلپور پہنچے ہیں۔ آج ملک کے نوجوان، مائیں بہنیں، کسان، اور مزدور سبھی امید بھری نظروں سے کانگریس کی طرف دیکھ رہے ہیں اور اس سفر میں شامل ہو رہے ہیں۔ انہوں نے کہا کہ اس دورے نے انہیں یقین دلایا ہے کہ صرف کانگریس ہی بی جے پی کی ناانصافی پر مبنی حکمرانی سے نجات دلائے گی۔ اس یاترا نے کانگریس کو ایک نئی شناخت دی ہے۔

اکھلیش سنگھ نے کہا کہ بہار میں ہم تقریباً 1230 کلومیٹر کا سفر کریں گے اور پارٹی کے سابق صدر راہل گاندھی کے پیغام کو ہر گھر تک پہنچانے کی کوشش کریں گے۔ بہار میں ہماری کوشش ہے کہ سال 1990 میں کانگریس کی جو پوزیشن تھی وہ بحال ہو۔ انہوں نے کہا کہ بہار میں کانگریس 55 یا 58 دنوں کے سفر کے بعد ہی ایک مضبوط پوزیشن میں نظر آئے گی۔

بہار میں کانگریس کے انچارج بھکت چرن داس نے کہا کہ راہل گاندھی کی قیادت میں پورے ملک میں بڑے پیمانے پر بھارت جوڑو یاترا کا انعقاد کیا جا رہا ہے۔ اس یاترا میں ہر ذات، مذہب اور فرقہ کے لوگ شرکت کر رہے ہیں۔ انہوں نے کہا کہ بی جے پی کے لوگ مذہبی کشیدگی پھیلانے کی کوشش کر رہے ہیں۔ بی جے پی نہ تو مہنگائی اور نہ ہی بے روزگاری کی بات کر رہی ہے۔ یہ یاترا کسانوں کے حقوق اور پانی، زمین اور جنگلات کے تحفظ کے لیے ہے۔