’جھوٹے جملوں کے پرے ایک دنیا ہے جہاں کئی گھروں میں چولہا تک نہیں جل پا رہا‘

مرکز کی مودی حکومت کی عوام مخالف پالیسیوں کے خلاف کانگریس لیڈر راہل گاندھی کا حملہ لگاتار جاری ہے۔ تازہ ترین حملہ انھوں نے منریگا مزدوروں کی مزدوری فوری طور پر نہ دیے جانے کو لے کر کیا ہے۔ کانگریس کے سابق صدر راہل گاندھی نے الزام عائد کیا ہے کہ حکومت منریگا مزدوروں کا حق مارکر ان کا پیسہ جاری نہیں کررہی ہے، اور اس وجہ سے کئی ریاستو ں میں منریگا مزدوروں کو ادائیگی نہیں ہوپارہی ہے۔

راہل گاندھی نے اس سلسلے میں ایک ٹوئٹ کیا ہے جس میں لکھا ہے کہ ’’کئی ریاستوں میں منریگا مزدوروں کو مزدوری کا پیسہ نہیں مل رہا ہے۔ وبا میں جب حکومت کو اضافی معاشی مدد دینی چاہیے تھی، تب مزدوروں کے حق کا پیسہ بھی مارا جا رہا ہے۔‘‘ ساتھ ہی انھوں نے سوال کیا ہے کہ ’’جھوٹے جملوں کے پرے ایک دنیا ہے جہاں کئی گھروں میں چولہا تک نہیں جل پا رہا- یہ کیسے اچھے دن؟‘‘

واضح رہے کہ اس سے قبل راہل گاندھی نے رافیل سودے میں ہوئے مبینہ گھپلہ اور پٹرول-ڈیزل کی لگاتار بڑھتی قیمتوں کو لے کر ایک ٹوئٹ کیا تھا۔ یہ ٹوئٹ کافی دلچسپ انداز میں کیا گیا تھا کیونکہ ٹوئٹر صارفین سے ایک خالی جگہ کو پر کرنے کے لیے کہا گیا تھا۔ راہل گاندھی نے ٹوئٹ میں لکھا تھا ’’خالی جگہ کو بھریں: ’متروں‘ والا رافیل ہے/ ٹیکس وصولی-مہنگا تیل ہے/ پی ایس یو-پی ایس بی کی اندھی سیل ہے/ سوال کرو تو جیل ہے/ مودی سرکار ...... ہے!‘‘ ظاہر ہے بیشتر ٹوئٹر صارفین نے خالی جگہ کو ’فیل‘ لفظ سے پُر کیا، اور اس طرح مکمل جملہ ’مودی سرکار فیل ہے‘ کی شکل میں سامنے آیا۔