پنجاب کے بینس برادران کانگریس میں شامل، لوک انصاف پارٹی کا بھی کانگریس میں انضمام

لوک سبھا انتخابات کے درمیان پنجاب میں کانگریس کو مزید مضبوطی حاصل ہوئی ہے۔ لدھیانہ سے دو بار کے رکن اسمبلی رہنے والے بلوندر سنگھ بینس اور سمرجیت سنگھ بینس نے کانگریس میں شمولیت اختیار کر لی ہے۔ انہیں بینس برادران کے نام سے بھی جانا جاتا ہے۔ اتوار (12 مئی) کو دہلی میں راہل گاندھی سے ملاقات کے بعد پنجاب کانگریس کے انچارج دیویندر یادو نے انہیں پارٹی میں شامل کرایا۔ اس دوران پارٹی میں بنس برادران کا استقبال کرتے ہوئے دیویندر یادو نے کہا کہ اس سے نہ صرف لدھیانہ پارلیمانی حلقہ بلکہ پوری ریاست میں کانگریس کو تقویت ملے گی۔

بلوندر سنگھ بینس اور سمرجیت سنگھ بینس نے 2012 سے 2022 تک اتم نگر اور لدھیانہ جنوبی اسمبلی حلقوں کی نمائندگی کی ہے۔ 2019 کے عام انتخابات میں سمرجیت سنگھ بینس نے لوک انصاف پارٹی کے ٹکٹ پر الیکشن لڑا تھا اور تقریباً 3.07 لاکھ ووٹ حاصل کیے تھے۔ حالانکہ اتنے زیادہ ووٹ حاصل کرکے بھی وہ دوسرے نمبر پر رہے۔ 2016 میں سمرجیت سنگھ بینس نے لوک انصاف پارٹی کی بنیاد رکھی تھی، آج وہ بھی باضابطہ طور پر کانگریس پارٹی میں ضم ہو گئی ہے۔ بلوندر سنگھ بینس شرومنی گوردوارہ مینجمنٹ کمیٹی کے رکن بھی ہیں۔ کانگریس میں شامل ہونے کے بعد بینس برادران نے کہا کہ وہ غیر مشروط طور پر کانگریس پارٹی میں شامل ہوئے ہیں اور یقین دلایا کہ وہ نہ صرف لدھیانہ بلکہ ریاست کے دیگر حلقوں میں بھی پارٹی کی جیت کو یقینی بنائیں گے۔

واضح رہے کہ لدھیانہ پنجاب کے 13 لوک سبھا حلقوں میں سے ایک ہے۔ یہ پنجاب کا ایک بڑا صنعتی شہر بھی ہے۔ لدھیانہ لوک سبھا حلقہ کے اندر 9 اسمبلی سیٹیں ہیں۔ جس میں لدھیانہ ایسٹ، لدھیانہ ساؤتھ، اتم نگر، لدھیانہ سینٹرل، لدھیانہ ویسٹ، لدھیانہ نارتھ، گل (محفوظ)، ٹھکھا اور جگرون (محفوظ) اسمبلی سیٹیں شامل ہیں۔ 2019 کے لوک سبھا انتخاب میں اس سیٹ سے کانگریس کے رونیت سنگھ بٹو نے جیت حاصل کی تھی۔ انہیں 3,83,795 ووٹ ملے۔ جبکہ لوک انصاف پارٹی کے سمرجیت سنگھ بینس 3,07,423 ووٹوں کے ساتھ دوسرے اور شرومنی اکالی دل کے مہیشندر سنگھ 2,99,435 ووٹوں کے ساتھ تیسرے نمبر پر تھے۔