گھر واپسی: ناراض حنا شہاب اور اسامہ شہاب آر جے ڈی میں شامل، تیجسوی نے کہا- ’شمولیت سے پارٹی کو مضبوطی ملے گی‘

سیوان کے سابق رکن پارلیمنٹ محمد شہاب الدین کی اہلیہ حنا شہاب اور ان کے بیٹے اسامہ شہاب نے اتوار کو آر جے ڈی میں شمولیت اختیار کر لی۔ آر جے ڈی صدر لالو پرساد یادو اور حزب مخالف کے لیڈر تیجسوی یادو نے دونوں ماں بیٹے کو پارٹی کی رکنیت دلائی۔ اس موقع پر لالو پرساد یادو نے کہا کہ شہاب الدین صاحب کا پریوار کبھی ہم سے دور نہیں تھا اور ہم پھر ساتھ ہیں۔ ساتھ ہی تیجسوی یادو نے کہا کہ حنا شہاب اور اسامہ شہاب کے آنے سے آر جے ڈی کو مضبوطی ملے گی۔

شمولیت کے موقع پر تیجسوی یادو نے برسر اقتدار این ڈی اے حکومت پر حملہ کرتے ہوئے کہا کہ ’’بہار میں نتیش کمار جی کی سربراہی میں جو سرکار چل رہی ہے، وہ نفرت پھیلانے کا کام کرتی ہے۔ جس کی وجہ سے سماج سے امن و سکون ختم رہا ہے۔ ترقی کی جگہ پر بہار تنزلی کی شکار ہو چکی ہے۔ اس نفرتی حکومت کے خلاف سبھی کو ایک ساتھ آ کر مضبوطی سے لڑنا چاہئے۔

حنا شہاب اور اسامہ شہاب کی آر جے ڈی میں شمولیت کے وقت لالو پرساد یادو اور تیجسوی یادو کے ساتھ ساتھ پارٹی کے کئی بڑے لیڈران موجود تھے۔ جن میں سابق وزیر اعلیٰ رابڑی دیوی، آر جے ڈی کے ریاستی صدر جگدانند سنگھ، قومی پرنسپل سکریٹری عبد الباری صدیقی، راجیہ سبھا رکن سنجئے یادو، قومی جنرل سکریٹری فیصل علی، آر جے ڈی کے ریاستی ترجمان شکتی سنگھ یادو، ترجمان اعجاز احمد، ہیڈ کوارٹر انچارج مکند سنگھ سمیت دیگر معزز لیڈران اس موقع پر موجود تھے۔

قابل ذکر ہے کہ سابق رکن پارلیمنٹ محمد شہاب الدین کا قد آر جے ڈی میں کافی بڑا تھا۔ ان کا شمار لالو پرساد یادو کے سب سے قریبی اور خاص لیڈران میں ہوتا تھا۔ شہاب الدین پریوار اور آر جے ڈی میں جو وقتی دوری تھی، وہ اب ختم ہو چکی ہے۔ حالیہ اختتام پذیر لوک سبھا انتخاب میں حنا شہاب نے آزاد امیدوار کے طور پر انتخاب میں اترنے کا فیصلہ کیا تھا۔ جس میں حنا شہاب اور آر جے ڈی کو کافی نقصان ہوا تھا۔ ایسے میں آنے والے ریاستی اسمبلی انتخاب سے قبل شہاب الدین پریوار کی آر جے ڈی میں شمولیت سے، پارٹی سیوان اور اس کے پاس کے علاقوں میں کافی مضبوطی ہوگی۔