بابری مسجد انہدام: لال کرشن اڈوانی کا بیان سی بی آئی کی خصوصی عدالت میں آج ہوگا درج

سابق نائب وزیر اعظم لال کرشن اڈوانی بابری مسجد انہدام معاملہ میں آج اپنا بیان سی بی آئی کی خصوصی عدالت کے سامنے درج کرائیں گے۔ لال کرشن اڈوانی کی سی بی آئی کی عدالت میں یہ پیشی ویڈیو کانفرنسنگ کے ذریعہ ہوگی۔ بابری مسجد انہدام معاملہ میں آج یہ سماعت صبح تقریباً 11 بجے شروع ہوگی۔ اس سے قبل جمعرات کو بی جے پی لیڈر مرلی منوہر جوشی نے اپنا بیاج ویڈیو کانفرنسنگ کے ذریعہ سی بی آئی عدالت میں درج کرایا تھا۔

قابل ذکر ہے کہ گزشتہ بدھ کے روز مرکزی وزیر داخلہ امت شاہ نے لال کرشن اڈوانی کی رہائش پر جا کر ان سے ملاقات کی تھی۔ امکان ظاہر کیا جا رہا ہے کہ امت شاہ کی یہ ملاقات بابری مسجد انہدام معاملہ کی ہو رہی سماعت کے تعلق سے تھی کیونکہ جو وکیل اس کیس میں اڈوانی کی معاونت کریں گے ان وکلاء کی ٹیم کے ساتھ امت شاہ سابق نائب وزیر اعظم لال کرشن اڈوانی کے گھر پہنچے تھے۔

واضح رہے کہ اڈوانی بابری مسجد انہدام معاملہ کے ملزمین میں سے ایک ہیں۔ بابری مسجد انہدام کے معاملے میں اس وقت ملزمین کے بیان درج کیے جا رہے ہیں۔ سبھی 32 ملزمین کے بیان سی آر پی سی کی دفعہ 313 کے تحت درج ہو رہے ہیں۔ ایودھیا ڈھانچہ انہدام معاملہ میں 6 دسمبر 1992 کو تھانہ رام جنم بھومی میں ایف آئی آر درج کرائی گئی تھی۔ اس معاملے میں سی بی آئی نے جانچ کرتے ہوئے 49 ملزمین کے خلاف خصوصی عدالت میں فرد جرم داخل کیا تھا، جب کہ ملزمین میں سے 17 کی موت ہو چکی ہے۔

یہ بات بھی قابل غور ہے کہ سپریم کورٹ کی ہدایت کے مطابق سی بی آئی کی خصوصی عدالت کو 31 اگست تک معاملے کی سماعت پوری کرنی ہے۔ مدھیہ پردیش کی سابق وزیر اعلیٰ اوما بھارتی اور اتر پردیش کے سابق وزیر اعلیٰ کلیان سنگھ نے ڈھانچہ انہدام معاملہ میں اپنا بیان پہلے ہی سی بی آئی عدالت میں درج کرا دیا ہے۔ اس معاملہ میں سی بی آئی کی خصوصی عدالت روزانہ سماعت کر رہی ہے۔