ڈاکٹروں کے یومِ سیاہ کے دوران بابا رام دیو کا بلیک فنگس کی دوا تیار کرنے کا دعویٰ!

نئی دہلی: میڈیکل سائنس اور ڈاکٹروں کے خلاف بیان بازی کر کے تنازعہ کھڑا کرنے والے بابا رام دیو نے اب اعلان کیا ہے کہ انہوں نے آیروید کے ذریعے ملک میں پھیل رہی بلیک فنگس کا علاج دریافت کر لیا ہے اور جلد ہی وہ اس کی دوا متعارف کرا دیں گے۔ رام دیو نے ’آج تک‘ کے ایک پروگرام کے دوردان دعوی کیا ہے کہ کہ بلیک فنگس، وائٹ فنگس اور یلو فنگس کی دوا پر کام پورا ہو چکا ہے اور ایک ہفتہ کے اندر وہ اس سے لانچ کر دیں گے۔ ادھر، ڈاکٹر رام دیو سے اس قدر نالاں ہیں کہ ان کے خلاف تھانوں میں ایف آئی آر کر کے ساتھ ہی آج یعنی یکم جون کو ان کے خلاف یوم سیاہ منایا جا رہا ہے۔

خیال رہے کہ رام دیو کی پتنجلی کی جانب سے بازار میں لائی گئی کورونا کی دوا ’کورونیل‘ پر تمام طرح کے سوال اٹھتے رہے ہیں اور ڈاکٹروں کا کہنا ہے کہ ان کی دوا سے کورونا سے شفا حاصل ہوتی ہے اس کا کوئی ثبوت موجود نہیں ہے۔ اس سب کے باوجود رام دیو نہ صرف نئی دوا تیار کر لینے کا اعلان کر رہے ہیں بلکہ ڈاکٹروں کے خلاف بھی لگاتار بیان دے رہے ہیں۔

رام دیو نے کہا، ’’تنازعہ کے باجود میں لوگوں کی 18 گھنٹے خدمت کر رہا ہوں اور بہت جلد، ایک ہفتہ کے اندر بلیک فنگس، یلو فنگس اور وائٹ فنگس کا علاج آیروید کے ذریعے فراہم کرنے والا ہوں۔ کام ہو چکا ہے اور آزمائش حتمی مرحلہ میں ہے۔ ہم تاحال فنگس کی دوا بنا رہے ہیں۔‘‘ رام دیو نے اس موقع پر بھی ڈاکٹروں کی تنظیم آئی ایم اے کو ہدف تنقید بناتے ہوئے کہا کہ آئی ایم اے نا تو کوئی سائنسی ادارہ ہے اور نا ہی اس کے پاس کوئی لیب یا سائنسداں موجود ہے، یہ تو محض ایک این جی او ہے۔

خیال رہے کہ حال ہی میں بابا رام دیو کی ایک ویڈیو وائرس ہوئی تھی جس میں وہ ڈاکٹروں پر الزام عائد کرتے ہوئے کہتے ہیں کہ جو ڈاکٹر خود کورونا سے مر رہے ہیں وہ کیا کورونا کا علاج کریں گے۔ انہوں نے یہ بھی کہا تھا کہ اتنے لوگ اسپتالوں میں جانے کے بعد شفایاب نہیں ہوئے جتنے ڈاکٹروں کی دوا کھانے کی وجہ سے مر گئے! انہوں نے میڈیکل سائنس کو آیروید سے کمتر قرار دیتے ہوئے ڈاکٹروں کے خلاف اور بھی کئی باتیں کہی تھیں۔

اس پر ڈاکٹروں نے سخت ناراضگی کا اظہار کیا۔ دہرادیوں کی آئی اے ایم کی یونٹ رام دیو کو ایک ہزار کروڑ کے ہرجانے کا نوٹس بھیج چکی ہے جبکہ ملک کے کئی شہروں میں ان کے خلاف ایف آئی آر درج کرائی گئی ہیں۔ فیڈریشنف ریزیڈنٹ ڈاکٹر ایسوسی ایشن (فورڈا) کے سربراہ ڈاکٹر منیش نے کہا ہے کہ ان کی تنظیم سے وابستہ ملک کے تمام ریزیڈنٹ ڈاکٹرز یکم جون کو یوم سیاہ منائیں گے۔