ٹینک کی نمائش سے جذبہ حب الوطنی کو زندہ کریں گے:اعظم خان

رامپور۔ جوہر یونیورسٹی کیمپس میں رکھے جانے کے لئے ہندوستانی فوج کا ٹینک کیمپس میں پہنچ چکا ہے۔ ’چابک‘ نامی اس ٹینک کو حاصل کرنے کے بعد یونیورسٹی کے چانسلر اور سماجوادی پارٹی کے قدآور رہنما اعظم خان نے خوشی کا اظہار کرتے ہوئے ہندوستانی فوج کا شکریہ ادا کیا ہے۔ اعظم خان نے کہا ہےکہ اس سے یہاں حب الوطنی کا ماحول پیدا ہوگا اور وہ چاہتے ہیں کہ ہندوستانی فوج ان کی یونیورسٹی کو مستقبل میں بھی جنگی ساز و سامان دستیاب کرائے تاکہ وہ اس کی نمائش لگا کر لوگوں میں جذبہ حب الوطنی کو زندہ کر سکیں۔

اعظم خان نے کہا کہ یہ فخر کی بات ہے کہ جوہر یونیورسٹی کے لئے فوج نے ٹینک بھجوایا۔ انہوں نے کہا کہ 12 -14 یونیورسٹیوں جن کو یہ تحفہ ملا ہے ان میں جوہر یونیورسٹی کا مقام اول ہے ۔ اعظم خان نے مزید کہا کہ فوج ایسے ہی کوئی تحفہ نہیں دیتی بلکہ پوری جانچ پرکھ پر ادارے کے میعار کا جائزہ لیا جاتا ہے۔ انہوں نے کہا کہ جوہر یونیورسٹی کی شبیہ کو ماضی میں خراب کرنے کی کوشش کی گئی لیکن اب جب فوج نے خود تحفہ دے دیا ہے تو حریفوں کو یہ قبول کرلینا چاہئے کہ فوج کسی ایسے ادارے کو تحفہ نہیں دیگی جو بد نام زمانہ ہو۔

اعظم خان نے کہا کہ ہندوستانی فوج کی طرف سے یہ تحفہ حاصل ہونے کے ساتھ وہ اب فوج کے کنبہ کا حصہ ہو گئے ہیں اور وہ چاہتے ہیں کہ اب انہیں جنگی جہاز ، ہیلی کاپٹر اور جدید توپیں بھی فراہم کی جائیں جن کی نمائش لگا کر یونیورسٹی لوگوں کو یہ دکھا سکے کہ فوج کے پاس کس طرح کے ہتھیاروں کا زخیرہ موجود ہے۔

اعظم خان نے خوشی کا اظہار کرتے ہوئے اپنے حریفوں پر طنز بھی کیا۔ انہوں نے کہا ٹینک یہاں پہنچنے پر اب جنہیں رونا ہے وہ آج ساری رات گھٹنوں میں منہ چھپا کر روئیں ۔ انہوں نے کہا کہ رونے والے اپنے چراغ نہ جلا کر اپنے دل جلائیں۔

ٹینک کو منگانے کے لئے کیا عمل اختیار کیا گیا اس سوال کے جواب میں اعظم خان نے کہا کہ انہوں نے اس کی درخواست دی تھی اور کافی کوششیں بھی کی تھیں لیکن جوہر یونیورسٹی کو ہندوستان میں سب سے بہتر تصور کر کے یہ تحفہ دیا گیا۔

انہوں نے کہا کہ انہیں تحفہ فوج نے دیا ہے جو بی جے پی کی کوئی تنظیم نہین ہے اور وہاں سے اگر انہیں تحفہ مل رہا ہے تو سیاسی پارٹی کو کسی خوش فہمی میں نہیں رہنا چاہئے اور یہ سمجھ لینا چاہئے کہ فوج کا وقار سیاسی جماعتوں سے بہت بلند ہے۔