ایودھیا: رام مندر کی سیکورٹی میں تعینات ایک جوان کی گولی لگنے سے موت، اہل خانہ کے نہیں رک رہے آنسو

ایودھیا میں رام مندر کی سیکورٹی میں تعینات اسپیشل سیکورٹی فورسز کے ایک جوان کی آج صبح گولی لگنے سے موت ہو گئی۔ گولی کس طرح چلی اور جوان کو کیسے لگی، فی الحال اس سلسلے میں کچھ بھی صاف نہیں ہے۔ سیکورٹی اہلکار کو مشتبہ حالات میں گولی لگنے کی خبر ملتے ہی پولیس کے اعلیٰ افسران موقع پر پہنچے اور تحقیقات شروع کر دی۔

بتایا جا رہا ہے کہ مہلوک جوان کا نام شتروگھن وشوکرما تھا جو امبیڈکر نگر کا باشندہ تھا۔ بدھ کی صبح جب گولی چلنے کی آواز ہوئی تو شری رام جنم بھومی احاطہ میں افرا تفری کا ماحول پیدا ہو گیا۔ گولی کی آواز سن کر مہلوک جوان کے ساتھی سیکورٹی اہلکار جائے وقوع پر پہنچے تو وہ خون میں شرابور تھا۔ آناً فاناً میں اسے اسپتال لے جایا گیا جہاں سے زخمی جوان کو ٹراما سنٹر ریفر کر دیا گیا۔ وہاں ڈاکٹروں نے اسے مردہ قرار دے دیا۔ بعد ازاں پولیس نے لاش کو پوسٹ مارٹم کے لیے بھجوا دیا ہے۔

مہلوک جوان کی عمر تقریباً 25 سال بتائی جا رہی ہے اور اس کے گھر والوں کو جیسے ہی اس اندوہناک واقعہ کی خبر ملی ایک کہرام سا مچ گیا۔ شتروگھن کی موت کی خبر کے بعد اہل خانہ کا رو رو کر برا حال ہے، ان کے آنسو نہیں رک رہے ہیں۔ بتایا جا رہا ہے کہ شتروگھن کو اسپیشل سیکورٹی فورس (ایس ایس ایف) میں 2019 میں ملازمت ہوئی تھی۔ امبیڈکر نگر کے تھانہ سمن پور واقع کجپورہ گاؤں کے رہنے والے شتروگھن کی تعیناتی کچھ سال قبل رام مندر احاطہ میں ہوئی تھی۔ ایس ایس ایف کی تشکیل چار سال قبل یوگی آدتیہ ناتھ حکومت نے مندروں کی سیکورٹی کے لیے کیا تھا۔

بہرحال، جوان کی موت کے بعد ایودھیا کے آئی جی اور ایس ایس پی سمیت پولیس کے تمام بڑے افسران متحرک ہو گئے ہیں۔ پولیس نے فورنسک ٹیم کو بھی جائے وقوع پر بلا لیا ہے۔ فورنسک ٹیم نے جائے حادثہ پر تحقیقات شروع کر دی ہے۔ کچھ میڈیا رپورٹس کے مطابق جوان کے کچھ ساتھیوں کا کہنا ہے کہ گزشتہ کچھ دنوں سے وہ پریشان چل رہا تھا۔ حادثہ سے پہلے وہ موبائل دیکھ رہا تھا۔ پولیس نے شتروگھن کے موبائل کو بھی جانچ کے لیے بھیج دیا ہے۔ قابل ذکر ہے کہ رام مندر کی سیکورٹی میں تعینات مزید ایک جوان کو تین ماہ قبل گولی لگی تھی۔ اس وقت جوان کی اپنی غلطی سے گولی چل گئی تھی۔ جانچ کے بعد پتہ چلا تھا کہ بندوق صاف کرتے وقت غلطی سے ٹریگر دَب گیا تھا اور گولی جوان کو لگ گئی تھی۔