بھومی پوجن: پی ایم مودی سے پہلے آر ایس ایس سربراہ بھاگوت کریں گے ملک سے خطاب!

ایودھیا میں رام مندر تعمیر کے لیے آئندہ 5 اگست کو بھومی پوجن کی سبھی تیاریاں مکمل کر لی گئی ہیں۔ پی ایم نریندر مودی اس موقع پر موجود رہیں گے اور میڈیا ذرائع کے مطابق وہی ’شبھ مہورت‘ میں سنگ بنیاد رکھیں گے۔ لیکن اس درمیان ایسی خبریں سامنے آ رہی ہیں کہ بھومی پوجن کے بعد عوام سے خطاب کرنے والے پہلے شخص پی ایم مودی نہیں ہوں گے۔

دراصل کچھ نیوز پورٹل پر شائع خبروں کے مطابق بھومی پوجن کے ٹھیک بعد پی ایم نریندر مودی ایودھیا کی زمین سے ملک کو خطاب کریں گے، لیکن ان سے ٹھیک پہلے آر ایس ایس سربراہ موہن بھاگوت کا خطاب ہوگا۔ حالانکہ اس سلسلے میں ابھی تک کچھ پتہ نہیں چل سکا ہے کہ موہن بھاگوت کا خطاب کتنی دیر کا ہوگا۔ پی ایم مودی کے تعلق سے ایسی خبریں ضرور آئی ہیں کہ وہ تقریباً ایک گھنٹہ خطاب کریں گے۔

واضح رہے کہ بھومی پوجن کے اصل پروگرام کی شروعات 5 اگست کو ہوگی، لیکن بھومی پوجن کے لیے مذہبی پوجا اور دوسری رسمیں پیر کے روز سے ہی شروع ہو گئی ہیں۔ گوری گنیش پوجا کے ساتھ بھومی پوجن کا جو عمل ایودھیا میں شروع ہوا ہے وہ منگل کو رامارچا پوجا کے ساتھ آگے بڑھتے ہوئے 5 اگست کو مختلف رسموں کو پورا کرتے ہوئے بھومی پوجن کے ساتھ اختتام پائے گا۔