آندھرا پردیش میں آٹو رکشہ اور بس میں تصادم، تین افراد ہلاک

وجئے واڑہ: آندھرا پردیش کے پالاناڈو ضلع میں جمعہ کو آر ٹی سی بس اور آٹو رکشہ کے درمیان تصادم ہو گیا جس میں کھیت میں کام کرنے والے 3 مزدور ہلاک اور 13 دیگر زخمی ہو گئے۔

پولیس سے ملی اطلاع کے مطابق یہ حادثہ ضلع کے چکلوری پیٹ منڈل کے لنگونٹلا میں پیش آیا۔ تقریباً 15 مزدور ایک آٹو رکشہ میں ویلورو گاؤں سے اپا پورم گاؤں کی طرف جا رہے تھے۔ آندھرا پردیش اسٹیٹ روڈ ٹرانسپورٹ کارپوریشن کی بس مچیرلا ڈپو سے چلکا لوری پیٹ جا رہی تھی۔

جب آٹو رکشہ اندرونی سڑک سے چیلا کالور یپیٹ مین روڈ پر آیا تو بس ڈرائیور نے اس سے ٹکرانے سے بچنے کی کوشش کی جس کے نتیجہ میں آٹو رکشہ بس کے نیچے آگیا۔ یہ حادثہ اس قدر بھیانک تھا کہ آٹو رکشہ کے پرخچے اڑ گئے اور اس میں سوار 1 شخص کی موقع پر ہی موت ہو گئی، جب کہ 2 دیگر نے چلکالوری پیٹ کے سرکاری اسپتال میں دم توڑ دیا۔

اس حادثے میں تیرہ دیگر لوگ زخمی ہو گئے ہیں جن کا علاج جاری ہے ۔ ان میں سے 2 کی حالت تشویشناک بتائی جاتی ہے۔ مرنے والوں کی شناخت 60 سالہ وائی ہنومیما، 58 سالہ جی شیوا پاروتی اور 65 سالہ شیخ حضرت ولی کے طور پر کی گئی ہے۔