اگرتلہ میں کانگریس کے دفتر پر حملہ، راہل گاندھی نے کہا- ’بی جے پی کے غنڈوں کو سزا ملنی چاہئے‘

نئی دہلی: تریپورہ کی اگرتلہ سیٹ پر ضمنی انتخابات میں جیت حاصل کرنے کے بعد کانگریس کے ریاستی دفتر پر حملہ ہوا جس میں پارٹی کے ریاستی صدر بیراجیت سنہا لہولہان ہو گئے ہیں۔ کانگریس پارٹی اور راہل گاندھی نے اس پر سخت رد عمل ظاہر کیا ہے۔ کانگریس پارٹی نے کہا ہے کہ خون میں ڈوبی سیاست ہی بی جے پی کا اصلی چہرہ ہے۔ جبکہ راہل گاندھی نے کہا کہ بی جے پی کے غنڈوں کو سزا ملنی چاہئے۔

خیال رہے کہ اگرتلہ ضمنی انتخاب میں کانگریس امیدوار سدیپ رائے برمن نے جیت حاصل کی ہے۔ یوں تو تریپورہ میں بی جے پی نے چار میں سے تین سیٹیں (سورما، ٹاؤن باردوولی اور یوراج نگر) پر کامیابی حاصل کی ہے۔ تاہم اگرتلہ کی سیٹ ان میں سب سے زیادہ اہمیت کی حامل ہے۔ یہی وجہ ہے کہ اس پر کانگریس کی جیت کے بعد بی جے پی بوکھلاہٹ کا شکار ہو گئی اور کانگریس کے دفتر پر حملہ کر دیا۔

الزام ہے کہ بی جے پی کے حمایت یافتہ شرپسندوں نے اگرتلہ میں کانگریس ہیڈکوارٹر پر حملہ کیا۔ پارٹی آفس کا فرنیچر توڑ دیا گیا اور لیڈروں کو مارا پیٹا گیا ہے۔ یہاں تک تریپورہ ریاستی کانگریس کے صدر کو بھی نہیں بخشا گیا۔ ان کا سر پھٹ گیا ہے، تاہم بی جے پی نے ان الزامات کی تردید کی ہے۔

حملہ کے بعد کانگریس پارٹی کی جانب سے کہا گیا ’’ضمنی انتخاب میں ہماری بہتر کارکردگی اور سدیپ رائے برمن کی تاریخی جیت سے بوکھلا کر بی جے پی اب غنڈہ گردی اور تشدد پر اتر آئی ہے۔ یہ خون میں ڈوبی ہوئی سیاست ہی بی جے پی کا اصلی چہرہ ہے۔‘‘

وہیں راہل گاندھی نے ٹوئٹر پر لکھا، ’’اگرتلہ ضمنی انتخاب میں کانگریس کی جیت کے بعد ہمارے لیڈران اور کارکنان پر بی جے پی کے غنڈوں کے حملہ کی میں پرزور مذمت کرتا ہوں۔ عوام ہمارے ساتھ ہیں۔ یہ شرمناک ہے کہ پولیس حملہ کو روکنے کی بجائے خاموش تماشائی بن کر کھڑی رہی۔ ان بی جے پی کے غنڈوں کو سزا ملنی چاہئے۔‘‘