ملک میں خوف و تشدد کا ماحول، کانگریس کا مضبوط ہونا ضروری: گہلوت

جودھ پور: راجستھان کے وزیر اعلی اشوک گہلوت نے ملک میں خوف ، ڈراور تشدد کا ماحول بتاتے ہوئے کہا ہے کہ کانگریس کو مضبوط ہونے کی ضرورت ہے۔ اودےپور کے دورے کے بعد آج یہاں ہوائی اڈے پر پہنچے اشوک گہلوت نے میڈیا کو یہ بات بتائی۔ کانگریس کے رہنما رامیشور ڈوڈی کی ناراضگی کے سوال پر ، انہوں نے کہا کہ کانگریس کو متحد ہوکر انتخابی میدان میں اترنا چاہیے۔ گزشتہ لوک سبھا انتخابات میں ہم پچیس سیٹوں پر کامیاب نہیں ہوسکے تھے۔ کانگریس کو جیت دلانا ،کانگریس کی ذمہ داری ہے ، اس لئے ہر شخص مانتا ہے کہ کانگریس کو مضبوط ہونے کی ضرورت ہے۔

اشوک گہلوت نے کہا کہ ملک میں خوف ، ڈراور تشدد کے حالات ہیں اور جمہوریت کےلئے خطرہ بنا ہواہے۔ انہوں نے بھارتیہ جنتا پارٹی (بی جے پی) کو نشانہ بناتے ہوئے کہا کہ جیت ایک الگ بات ہے اور جیت کو ہضم کرنا ایک الگ چیز ، جیت کر بڑا دل رکھنا چاہیے۔ سب کوساتھ لےکر چلنا اور لوگوں کے مسئلوں کو حل کرتے ہوئے چلنا چاہیے۔

مہاراشٹرا میں اسمبلی انتخابات کے سوال پر ، اشوک گہلوت نے کہا کہ مہاراشٹر انتخابات کے نتائج سے پتہ چل جائےگا۔ مرکز میں مودی سرکار پر حملہ کرتے ہوئے انہوں نے کہا کہ قوم پرستی ، مذہب اور فوج کے پیچھے چھپ کر سیاست ہورہی ہے۔ انہوں نے کہا کہ ہماری دشمنی نہ تو بی جے پی ، نہ مودی اور نہ ہی آر ایس ایس سے ہے ، ہم انتخابات لڑیں گے اور ہمارا نظریہ ہمیشہ ملکی مفاد کے لئے رہا ہے۔

پلاسٹک پر پابندی کے سوال پر ، انہوں نے شیشے کی بوتل دکھائی اور کہا کہ اب وہ خود شیشے کی بوتل استعمال کرتے ہیں۔ گٹکےپرپابندی کے سوال پر ، اشوک گہلوت نے کہا کہ گٹکا پہلے ہی بند ہے ، اس کا فیصلہ سب کے مفاد میں کیا گیا ہے ، کیونکہ اس میں موجود کیمیکل لوگوں کی صحت کے لئے نقصان دہ ہے۔ اس سے قبل ایئرپورٹ پہنچنے پر کانگریس لیڈروں نے ان کا استقبال کیا۔ اس دوران کانگریس لیڈربدری رام جاکھڑ ، منیشا پوار ، دیویہ مدیرنا سمیت متعدد لیڈر اور پارٹی عہدیدار موجود تھے۔