آتشی دہلی کے وزیر اعلیٰ کے عہدے کا آج حلف لیں گی، صدر جمہوریہ نے کیا مقرر

صدر نے اروند کیجریوال کا استعفیٰ قبول کر لیا ہے اور عام آدمی پارٹی کی رہنما آتشی کو دہلی کا وزیر اعلیٰ مقرر کر دیا ہے۔ اس کے ساتھ صدر نے 5 وزراء کی تقرری کی بھی منظوری دی ہے۔ سب کو 21 ستمبر کو حلف برداری کی تقریب کے لیے راج بھون بلایا گیا ہے۔ ذرائع کے مطابق آتشی اپنی کابینہ کے ساتھ شام 4:30 بجے حلف لے سکتی ہیں۔

درحقیقت، منگل کو کیجریوال نے لیفٹیننٹ گورنر وی کے سکسینہ کو استعفیٰ دے دیا تھا جس کے بعد وی کے سکسینہ نے حکومت سازی کی فائلیں صدر دروپدی مرمو کو ان کی منظوری کے لیے بھیج دی تھیں۔ جس پر تقریب حلف برداری کے لیے 21 ستمبر کی تاریخ تجویز کی گئی تھی۔

عام آدمی پارٹی کے ارکان اسمبلی نے اس ہفتے کے شروع میں میٹنگ کی اور متفقہ طور پر آتشی  کو حکمران قانون ساز پارٹی کا لیڈر منتخب کیا۔ عام آدمی پارٹی کے ذریعہ اعلان کردہ نئی وزراء کونسل میں گوپال رائے، کیلاش گہلوت، سوربھ بھاردواج، عمران حسین اور نئے رکن مکیش اہلاوت شامل ہیں، جو سلطان پور ماجرا سے پہلی باررکن اسمبلی منتخب ہوئےہیں۔ رائے، گہلوت، بھاردواج اور حسین سبکدوش ہونے والی کیجریوال حکومت میں وزیر تھے۔

واضح رہے کہ عام آدمی پارٹی کے قومی کنوینر کیجریوال ایکسائز پالیسی کیس میں پانچ ماہ سے زیادہ تہاڑ جیل میں رہنے کے بعد 13 ستمبر کو ضمانت پر باہر آئے تھے۔ دو دن بعد ایک حیران کن اعلان میں، کیجریوال نے کہا کہ وہ بی جے پی کی طرف سے ان پر لگائے گئے بدعنوانی کے الزامات کے بعد استعفیٰ دے دیں گے۔ انہوں نے کہا کہ آئندہ اسمبلی انتخابات میں دہلی کے عوام سے ایمانداری کا سرٹیفکیٹ ملنے کے بعد وہ وزیر اعلیٰ کے عہدے پر واپس آئیں گے۔ اس کے بعد کیجریوال نے استعفیٰ دے دیا اور آتشی کو قانون ساز  پارٹی میٹنگ میں لیڈر منتخب کر لیا گیا۔

آتشی کا تعلق پنجابی راجپوت خاندان سے ہے اور وہ آکسفورڈ یونیورسٹی سے گریجویٹ ہیں۔ آتشی 2020 کے اسمبلی انتخابات میں پہلی بار رکن اسمبلیے منتخب ہوئیں اور 2023 میں پہلی بار کیجریوال حکومت میں وزیر بنیں۔ اب صرف ایک سال بعد 2024 میں وہ وزیر اعلیٰ بننے جا رہی ہیں۔ اس سے پہلے 2019 میں، انہوں نے مشرقی  دہلی لوک سبھا سیٹ سے الیکشن لڑا تھا اور وہ بی جے پی امیدوار گوتم گمبھیر سے 4.77 لاکھ ووٹوں سے ہار گئی تھیں اور تیسرے نمبر پر  رہی تھیں۔ آتشی کو کیجریوال کا قریبی ساتھی اور بااعتماد سمجھا جاتا ہے۔ وہ انا ہزارے کی تحریک کے وقت سے ہی تنظیم میں سرگرم ہیں۔

آتشی سال 2020 میں پہلی بار کالکاجی اسمبلی حلقہ سے رکن اسمبلی بنی تھیں ۔ انہوں نے بی جے پی امیدوار دھرم ویر سنگھ کو 11 ہزار 393 ووٹوں سے شکست دی تھی۔ آتشی کی پیدائش 8 جون 1981 کو دہلی میں ہوئی تھی۔ ان کے والد نم وجے سنگھ دہلی یونیورسٹی میں پروفیسر رہ چکے ہیں۔ آتشی نے اپنی اسکول کی تعلیم اسپرنگ ڈیل اسکول، نئی دہلی سے کی۔ انہوں نے سینٹ اسٹیفن کالج میں تاریخ کی تعلیم حاصل کی اور اسکالرشپ پر آکسفورڈ یونیورسٹی سے ماسٹر ڈگری حاصل کی۔ کچھ سال بعد، انہوں  نے تعلیمی تحقیق میں روہڈز اسکالر کے طور پر آکسفورڈ سے اپنی دوسری ماسٹر ڈگری حاصل کی۔ آتشی نے سات سال مدھیہ پردیش کے ایک چھوٹے سے گاؤں میں گزارے، جہاں وہ نامیاتی کاشتکاری اور ترقی پسند تعلیمی نظام سے جڑیں ۔