اروند کیجریوال 22 ستمبر کو جنتر منتر پر’ جنتا کی عدالت' سے خطاب کریں گے

عام آدمی پارٹی کے کنوینر اور دہلی کے سابق وزیر اعلی اروند کیجریوال 22 ستمبر کو جنتر منتر پر 'جنتا کی عدالت'  یعنی عوامی عدالت سے خطاب کریں گے۔ ریاستی کنوینر گوپال رائے نے جمعرات19 ستمبر کو دہلی میں ڈویژنل انچارجوں کی میٹنگ سے خطاب کرتے ہوئے یہ جانکاری دی۔

واضح رہے کہ جیل سے باہر آنے کے بعد اپنے استعفیٰ کا اعلان کرتے ہوئے اروند کیجریوال نے کہا تھا کہ اب وہ عوامی عدالت میں جائیں گے۔ اروند کیجریوال نے منگل17 ستمبر کو لیفٹیننٹ گورنر وی کے سے ملاقات کی اور اپنا استعفیٰ پیش کیا۔

عام آدمی پارٹی کے قومی کنوینر کیجریوال منگل کی سہ پہر اپنے کابینہ کے ساتھیوں کے ساتھ ایل جی سکریٹریٹ پہنچے۔ عام آدمی پارٹی کی رہنما آتشی بھی ان کے ساتھ تھیں، جنہیں قانون ساز پارٹی کی میٹنگ میں کیجریوال کا جانشین منتخب کیا گیا تھا۔ اس سے قبل اتوار 15 ستمبر کو کیجریوال نے دہلی کے وزیر اعلیٰ کے عہدے سے استعفیٰ دینے کا اعلان کیا تھا۔

15 ستمبر کو اپنے استعفیٰ کا اعلان کرتے ہوئے اروند کیجریوال نے کہا تھا کہ وہ وزیر اعلیٰ کی کرسی پر تبھی بیٹھیں گے جب عوام انہیں آئندہ اسمبلی انتخابات میں ایمانداری کا سرٹیفکیٹ دیں گے۔ اس کے ساتھ ہی انہوں نے قومی راجدھانی میں قبل از وقت انتخابات کا مطالبہ بھی کیا۔ آپ کو بتاتے چلیں کہ اگلے سال فروری میں دہلی میں اسمبلی انتخابات ہونے کا امکان ہے۔ ایسے میں کیجریوال آئندہ انتخابات میں اپنی جیت کو یقینی بنانے کی حکمت عملی بنانے میں مصروف ہیں۔