مہاراشٹر میں مذہبی تقریب کے بعد کھانا کھا کر تقریباً 2000 لوگ بیمار، متاثرہ گاؤں میں سروے کے لیے 5 ٹیمیں تعینات

مہاراشٹر میں ایک مذہبی تقریب کے بعد کھانا کھانے سے تقریباً 2000 افراد بیمار ہو گئے ہیں۔ واقعہ ناندیڑ کے ایک گاؤں کا ہے جہاں منگل کے روز مذہبی تبلیغ کا پروگرام ہوا تھا۔ آس پاس کے کئی گاؤں سے لوگ تقریب میں پہنچے تھے اور تقریباً 5 بجے ہزاروں لوگوں نے ایک ساتھ بیٹھ کر کھانا کھایا تھا۔ بتایا جاتا ہے کہ بدھ کی صبح تک کئی لوگوں کی طبیعت ناساز ہو گئی۔ متعدد لوگوں کو الٹی اور دست کی شکایت ہونے لگی جس کی وجہ سے انھیں اسپتالوں کا رخ کرنا پڑا۔

پولیس کا کہنا ہے کہ لوہا تحصیل علاقہ کے کوشتواڑی گاؤں میں منگل کو یہ مذہبی تقریب منعقد ہوئی تھی۔ پولیس نے یہ بھی کہا کہ بڑی تعداد میں لوگوں کی طبیعت خراب ہونے کی خبر سامنے آئی جس کے بعد پہلے 150 لوگوں کو ناندیڑ کے لوہا واقع سَب ڈسٹرکٹ ہاسپیٹل میں داخل کرایا گیا۔ بعد میں کئی دیگر لوگوں کو بھی اس طرح کے ہیلتھ ایشوز ہونے لگے۔ پھر 870 مریضوں کو شنکر راؤ چوہان سرکاری میڈیکل کالج سمیت دیگر اسپتالوں میں داخل کرایا گیا۔ حالات کو دیکھتے ہوئے ضرورت پڑنے پر ناندیڑ کے سرکاری آیورویدک اسپتال میں مزید بستروں کا انتظام کیا گیا ہے۔

ایک افسر نے واقعہ کے تعلق سے جانکاری دیتے ہوئے بتایا کہ جانچ کے لیے مریضوں کے سیمپلس لیے جا چکے ہیں۔ ایسا لگتا ہے جیسے فوڈ پوائزننگ کی وجہ سے بڑی تعداد میں لوگوں کی طبیعت خراب ہوئی ہے۔ متاثرہ گاؤں میں سروے کے لیے پانچ ٹیموں کو تعینات کیا گیا ہے۔ افسران کا کہنا ہے کہ اس واقعہ کی جانچ کے لیے ایک ٹیم بھی تشکیل دے دی گئی ہے۔ اس درمیان مریضوں کی حالت مستحکم بتائی جا رہی ہے اور ایسی بھی خبریں ہیں کہ علاج کے بعد کئی مریضوں کو گھر بھی بھیج دیا گیا ہے۔