ارنب گوسوامی کو ممبئی پولیس نے کیا گرفتار! خودکشی کے پرانے معاملہ میں کارروائی

ممبئی: خودکشی کے ایک پرانے معاملہ میں ممبئی پولیس نے ریپبلک ٹی وی کے ایڈیٹر ان چیف ارنب گوسوامی کے خلاف کارروائی کی ہے۔ ممبئی پولیس نے گھر میں داخل ہو کر ارنب کو گرفتار کیا ہے۔ انرب گوسوامی کو مہاراشٹر سی آئی ڈی نے 2018 میں انٹیریر ڈیزائنر انوائے نائیک اور ان کی ماں کومُد نائیک کی خودکشی کے سلسلہ میں گرفتار کیا ہے۔ میڈیا رپورٹ کے مطابق گرفتار کے بعد ارنب کو علی باغ لے جایا گیا۔

خبر رساں ایجنسی اے این آئی کے مطابق ارنب گوسوامی نے الزام عائد کیا ہے کہ ممبئی پولیس نے ان کے ساتھ ہاتھاپائی کی ہے۔ ایجنسی نے ریپبلک ٹی وی چینل کے کچھ اسکرین شاٹ شیئر کئے ہیں جن میں پولیس ارنب گوسوامی کے گھر کے اندر داخل ہوتے ہوئے نظر آ رہی ہے۔ اس دوران جھڑپ بھی ہو رہی ہے۔

جس معاملہ میں ارنب گوسوامی کو گرفتار کیا گیا ہے وہ 2018 کا ہے، جب ایک 53 سالہ انٹیریر ڈیزائنر انوائے نائیک اور ان کی ماں کومد نائیک نے علی باغ علاقہ میں خود کشی کر لی تھی۔ اس واقعہ کے بعد ایک سوسائڈ نوٹ برآمد ہوا تھا جو مبینہ طور پر انوائے کا لکھا ہوا تھا۔ اس نوٹ میں انہوں نے کہا تھا کہ ارنب گوسوامی اور دو دیگران نے انہیں 5.40 کروڑ روپے کی ادائیگی نہیں کی جس کے سبب انہیں معاشی قلت کا سامنا کرنا پڑ رہا تھا۔

خیال رہے کہ ممبئی پولیس کی جانب سے تاحال ارنب گوسوامی کی گرفتاری کی تصدیق یا تردید نہیں کی گئی ہے۔ رپبلک ٹی وی پر چلائی جا رہی ایک ویڈیو میں اتنا ضرور نظر آ رہا ہے کہ پولیس ارنب کو گاڑی میں بیٹھا رہی ہے۔ چینل کا دعوی ہے کہ ارنب کو اس کیس میں گرفتار کیا گیا ہے جو پہلے ہی بند کیا جا چکا ہے۔ دریں اثنا، اس خبر کے ساتھ سوشل میڈیا پر #ArnabGoswami ہیش ٹیگ ٹرینڈ کرنے لگا ہے۔